کوئٹہ: (دنیا نیوز) فرنٹیئر کور نارتھ بلوچستان اور کوئٹہ کسٹمز نے انسداد سمگلنگ کے لیے ایک مشترکہ اور بڑی کارروائی کرتے ہوئے کوئٹہ سے سمگل شدہ سگریٹس، چھالیہ اور چائے برآمد کر لی۔
انسداد سمگلنگ کی اس بڑی کارروائی میں 10 ٹرک ضبط کر کے کسٹمز ویئر ہاؤس منتقل کردیئے گئے ہیں، اس کامیاب آپریشن میں ضبط شدہ اشیا کی مالیت تقریباً 70 کروڑ روپے ہے۔
واضح رہے کہ پچھلے 3 ہفتوں میں انسداد سمگلنگ کی کارروائیوں میں اربوں روپے مالیت کا سامان ضبط کیا گیا ہے جس میں 70 سے زائد لگژری گاڑیاں، سگریٹس، چائے، کپڑا، چھالیہ اور منشیات شامل ہیں۔
وفاقی حکومت اورعسکری قیادت کی ہدایت پر سمگلنگ کے ناسور کیخلاف ملک بھر میں کریک ڈاؤن جاری ہے، اس حوالے سے کلکٹر کسٹمز انفورسمنٹ کوئٹہ نے بتایا کہ پاک فوج اور قانون نافذ کرنے والے دیگر اداروں کے شانہ بشانہ سمگلنگ کیخلاف کارروائیاں جاری رکھیں گے۔
انہوں نے کہا ہے کہ دشمن عناصر کو مُلکی معیشت اور قومی سلامتی سے کھیلنے کی اجازت نہیں دی جائے گی، سمگلنگ کے ناسور کے مکمل خاتمے تک فرنٹیئر کور نارتھ بلوچستان اور کوئٹہ کسٹمز کی کارروائی جاری رہیں گی۔
