راولپنڈی: (دنیا نیوز) مورگاہ پولیس نے گھر میں چوری کی واردات کی تفتیش میں ملوث گھریلو ملازمہ کے والد کو بھی گرفتار کر لیا۔
ترجمان راولپنڈی پولیس کے مطابق ملزم سے مسروقہ طلائی زیورات کی فروخت سے حاصل ہونے والی رقم 5 لاکھ 50 ہزار روپے برآمد کر لی گئی ہے، اس سے قبل پولیس نے گھریلو ملازمہ کو گرفتار کر کے زیورات کی فروخت سے حاصل کی گئی 3 لاکھ 50 ہزار روپے کی رقم برآمد کی تھی۔
پولیس کا کہنا ہے کہ گھریلو ملازمہ کے انکشاف پر اس کے والد کو شاملِ تفتیش کیا گیا تو ملزم نے اپنی بیٹی کے ساتھ مل کر گھر سے طلائی زیورات چرانے اور انہیں فروخت کرنے کا اعتراف کیا، اس واقعے کا مقدمہ گزشتہ ماہ درج کیا گیا تھا۔
راولپنڈی پولیس کے مطابق زیرِ حراست ملزمان کو ٹھوس شواہد کے ساتھ چالان عدالت پیش کیا جائے گا تاکہ انہیں قانون کے مطابق قرار واقعی سزا دلوائی جا سکے۔
