اسلام آباد: (دنیا نیوز) ٹک ٹاکر سامعہ حجاب کو مبینہ اغوا اور دھمکیاں دینے کا مقدمہ، سامعہ حجاب نے عدالت میں اپنا بیان ریکارڈ کروا دیا۔
ڈسٹرکٹ اینڈ سیشن کورٹس اسلام آباد میں جج عامر ضیا نے استفسار کیا کہ کیا آپ کا معاملہ حل ہو گیا ہے، جس پر سامعہ حجاب نے کہا کہ جی ہمارا معاملہ طے ہو گیا ہے۔
جج نے استفسار کیا کہ کیا اس کیس کی مزید پیروی کرنا چاہتی ہیں؟ جس پر ٹک ٹاکر سامعہ حجاب نے جواب دیا کہ میں اپنا کیس واپس لیتی ہوں، مجھے ملزم کے ضمانت دینے اور بری ہونے پر کوئی اعتراض نہیں۔
عدالت نے ملزم حسن زاہد کی ضمانت منظور کر لی، واضح رہے کہ حسن زاہد کے خلاف تھانہ شالیمار میں دو مقدمات درج تھے۔
