لاہور: (ویب ڈیسک) معروف پاکستانی اداکارہ مہوش حیات نے سوشل میڈیا پر گردش کرنے والی ان خبروں کی سختی سے تردید کی ہے۔
یاد رہے کہ سوشل میڈیا پر یہ خبر گردش کر رہی تھی کہ اداکارہ پر برطانیہ میں داخلے پر پابندی عائد کی گئی ہے، جسے کو اداکارہ نے ’’مکمل طور پر قیاس آرائی اور جھوٹ‘‘ قرار دیا ہے۔
اپنے سوشل میڈیا اکاؤنٹس پر جاری ایک بیان میں مہوش نے ایسی بے بنیاد افواہوں کی مذمت کی جن میں کہا گیا تھا کہ ان پر مبینہ پابندی بھارتی گلوکار یو یو ہنی سنگھ کے میوزک ویڈیو میں ان کی شرکت کی وجہ سے عائد کی گئی ہے۔
اداکارہ نے واضح کیا کہ ان کے خلاف کوئی ایسی کارروائی نہیں کی گئی اور انہوں نے ان دعوؤں کو ’’جان بوجھ کر کئے گئے غلط مفروضوں‘‘ کا نتیجہ قرار دیا ہے۔
مہوش حیات نے لکھا کہ ’’میں ذمہ دار میڈیا پلیٹ فارمز سے گزارش کرتی ہوں کہ وہ ایسی خبروں کی تصدیق کریں، خاص طور پر جب یہ کسی کی ساکھ کو نقصان پہنچا سکتے ہیں‘‘۔
اداکارہ نے عندیہ دیا کہ وہ ایسی غلط معلومات پھیلانے والوں کے خلاف قانونی کارروائی کر سکتی ہیں۔
