کوئٹہ: (دنیا نیوز) کوئٹہ میں فائرنگ کے دو مختلف واقعات میں ایک لیویز اہلکار سمیت 5 افرادجاں بحق جبکہ 10 زخمی ہو گئے، قمبرانی روڈ پر فائرنگ کا واقعہ پرانی رنجش بتائی جاتی ہے۔
پولیس کے مطابق مچھ کے علاقے کھجوری سے گاڑی کوئٹہ کی جانب آرہی تھی کہ قمبرانی روڈ پر مختلف گروپ کے افراد نے وین کو روک لیا جس پر ان کے درمیان تکرار شروع ہو گئی اسی دوران ایک گروپ کی جانب سے فائرنگ شروع کر دی جس کے نتیجے میں لیویز اہلکار نوید و دیگر افراد عبدالحمید، غلام رسول اور بشیر موقع پر جاں بحق ہو گئے۔ فائرنگ سے گاڑی میں سوار10 افراد بھی زخمی ہو ئے۔
واقعہ کی اطلاع ملتے ہی پولیس موقع پر پہنچ گئی، زخمیوں کو فوری طور پر سول ہسپتال اور بی ایم سی منتقل کر دیا گیا۔ اس واقعہ کے آدھے گھنٹہ بعد سبی روڈ پر فائرنگ کے ایک اور واقعہ میں محمد اعظم نامی شخص کو فائرنگ کر کے قتل کردیا گیا۔ دونوں واقعات کے بعد پولیس نے علاقے کو گھیرے میں لے لیا اور تحقیقات شروع کر دی۔
