اسلام آباد: (دنیا نیوز) تحریک انصاف کی اعلیٰ قیادت ٹکٹوں کے معاملے پر تقسیم، ایک سینئر رہنماء نے پارٹی چھوڑنے کا عندیہ دیدیا۔ عمران خان شدید ذہنی دباؤ کا شکار ہیں۔
ٹکٹوں کی تقسیم پر لڑائی پی ٹی آئی کے کئی بڑوں کو ایک دوسرے سے بڑی دور لے گئی، جہانگیر ترین اور شاہ محمود قریشی کی لفظی جنگ جاری ہے۔لاہور میں ولید اقبال بھی گلے شکوؤں کےساتھ میدان میں کود پڑے۔ عمران خان نے پارلیمانی بورڈ توڑنے پر غور شروع کر دیا ہے۔
ذرائع کے مطابق پاکستان تحریک انصاف کی اعلیٰ قیادت ٹکٹوں کے معاملے پر تقسیم کا شکار ہے۔ ایک سینئر رہنماء نے ٹکٹوں کی تقسیم کے معاملے پر پارٹی چھوڑنے کا عندیہ دے دیا ہے۔ پارٹی ذرائع کے مطابق چیئرمین عمران خان اس وقت شدید ذہنی دباؤ میں ہیں اور موجودہ صورتحال میں کوئی بھی فیصلے کرنے میں تذبذب کا شکار ہیں۔ پارٹی کے اندرونی جھگڑوں کے باعث عمران خان نے پارلیمانی بورڈ تحلیل کرنے پر غور شروع کردیا ہے۔
