ملتان (دنیا نیوز ) ملتان میں یوم عاشور پر تعزیے کے 117 جلوس برآمد ہونگے جن میں استاد اور شاگرد کا تاریخی تعزیہ بھی شامل ہے جس کی سیکورٹی کیلئے پولیس کی بھاری نفری کو تعینات کیا گیا ہے۔
استاد کا تعزیہ محلہ جھک سے اور شاگرد کا تعزیہ پاک گیٹ سے برآمد ہو گا تاہم استاد کا تعزیہ اپنے روایتی راستے حرم گیٹ سے ہوتا ہوا امام بارگاہ شاہ رسال اور شاگرد کا تعزیہ دوبارہ پاک گیٹ میں ہی بعد نماز عصر اختتام پذیر ہو گا۔
تاہم یوم عاشور پر ہیرا حیدریہ سے برآمد ہونے والا علم اور ذوالجناح کا مرکزی جلوس اپنے روایتی راستوں کی جانب گامزن ہے۔ جلوس میں نوحہ خوانی، ماتم اور زنجیر زنی کا سلسلہ بھی شروع ہے۔
جلوس گھنٹہ گھر اور واٹر ورکس روڈ سے کربلا میں حضرت شاہ شمس سبزواری کے مزار پر بعد نماز مغرب اختتام پذیر ہو گا جس کے بعد ممتاز آباد کی امام بارگاہ میں شام غریباں برپا کی جائیگی
