لاہور: (دنیا نیوز) شہباز شریف نے کہا ہے کہ عوام کے شانہ بشانہ کورونا کی وبا سے لڑیں گے، عوام کو تنہا نہیں چھوڑیں گے۔
قائد حزب اختلاف شہباز شریف نے حفاظتی کٹس عوام میں تقسیم کرنے کی تقریب سے خطاب کرتے ہوئے کہا ہم نے ہر ممکن حد تک عوام کو کورونا سے بچانے کا سامان مہیا کرنا ہے، عوام کی اصل مدد یہ بھی ہے کہ وہ کورونا سے بچاؤ کی احتیاط پر عمل کریں، ایک لاکھ کٹس بنائی جارہی ہیں جو عوام میں تقسیم کی جائیں گی، اس کٹ میں ماسک، سینیٹائزر، صابن ہے، کٹ میں عوام کے لئے ہدایت نامہ بھی ہے۔
شہباز شریف نے رضاکارانہ امداد اور فلاحی ذمہ داریاں انجام دینے والے ن لیگ کے کارکنان کو خراج تحسین پیش کیا۔ انہوں نے کہا انسانوں کی خدمت کرنے سے اللہ خوش ہوتا ہے، یہ موقع ہے کہ ہم انسانوں کی خدمت کو اپنا شعار بنائیں، دیہاڑی دار مزدور اور کمزور طبقات بہت برے حالات میں ہیں، معاشی حالات سے تنگ افراد کی خودکشیوں کی اطلاعات باعث تشویش ہیں، ایسے اندوھناک واقعات قابل افسوس ہیں۔
