اسلام آباد: (ویب ڈیسک) پاکستان میں چین کے سفیر یاؤ جنگ نے پاکستانی عوام کو ماہ رمضان کی مبارکباد پیش کرتے ہوئے کورونا وائرس کے اس آزمائشی وقت میں چینی حکومت کی طرف سے پاکستان کو مکمل حمایت کی یقین دہانی کرائی۔
سماجی رابطے کی ویب سائٹ ٹویٹر پر رمضان المبارک کے حوالے سے خصوصی ویڈیو پیغام میں چینی سفیر یاؤ جنگ نے کہا کہ رمضان کے مقدس ماہ کے آغاز پر میں اپنے پاکستانی بھائیوں اور بہنوں کو دل کی گہرائیوں سے مبارکباد دیتا ہوں، رمضان مبارک۔
انہوں نے کہا کہ یہ ایک انتہائی چیلنجنگ وقت ہے اور پوری پاکستانی قوم نوول کورونا وائرس کے خلاف جدوجہد کر رہی ہے۔
یہ بھی پڑھیں: چین سے میڈیکل ایمرجنسی ریلیف اشیا کی دوسری کھیپ پاکستان پہنچ گئی
چینی سفیر نے کہا کہ اس آزمائش کی گھڑی میں چینی حکومت، چین کے عوام اور پاکستان میں مقیم چینی کمیونٹی وبا سے نمٹنے کے لیے اپنے پاکستانی عوام کی ہرممکن مدد کررہی ہے ۔
سفیر یاو جِنگ: اس آزمائش کی گھڑی میں چینی حکومت اور چینی عوام وبا سے نمٹنے کے لئے اپنے پاکستانی ہر ممکن مدد کر رہی ہے۔ پاکستان اس مہلک وائرس پر جلد قابو پالے گی۔ میں آگے صحت مند، محفوظ اور مبارک رمضان کی خواہش کرتا ہوں۔ #RamadanMubarak #Covid_19 @ForeignOfficePk @MFA_China pic.twitter.com/T6omFK5LgS
— Chinese Emb Pakistan (@CathayPak) April 25, 2020
انہوں نے کہا کہ ہم نے وبا کی روک تھام کے لیے پاکستان حکومت اور عوام کو لاکھوں کی تعداد میں طبی حفاظتی سازوسامان سمیت دیگر اشیا فراہم کی ہیں۔
یاؤ جنگ کا کہنا تھا کہ وائرس سے نمٹنے کے لیے کئی چینی طبی ماہرین پاکستانی طبی عملے کے ساتھ مل کر کام کر رہے ہیں۔
انہوں نے مزید کہا کہ میں اس نازک مرحلے پر اس مہلک وبا کے خلاف جدوجہد میں پاکستانی حکومت، طبی ماہرین اور عوام کی جانب سے کی جانے والی کوششوں اور قربانیوں کو خراج تحسین پیش کرتا ہوں۔
چینی سیفر نے کہا کہ مجھے یقین ہے کہ وزیر اعظم عمران خان کی زیر قیادت پاکستانی حکومت اور عوام اس مہلک وائرس کے چیلنج پر جلد قابو پالے گی۔
یاؤ جنگ نے اپنے پیغام کے اختتام پر کہا کہ میں پوری پاکستانی قوم کو اپنی مخلصانہ اور نیک خواہشات پیش کرنا چاہتا ہوں اور ایک صحت مند، محفوظ اور خوش آئند رمضان کی مبارکباد پیش کرتا ہوں۔
