پشاور: (دنیا نیوز) خیبرپختونخوا میں تحریک انصاف کو بڑی کامیابی ملی ہے، بلور خاندان کے سیاسی وارث غضنفر بلور نے پی ٹی آئی میں شمولیت اختیار کر لی۔
یاد رہے کہ بلدیاتی انتخابات سے قبل اے این پی رہنما غضنفر بلور نے پی ٹی آئی میں شمولیت اختیار کی ہے۔
وزیراعلیٰ خیبرپختونخوا محمود خان سے ملاقات میں غضنفر بلور نے وزیراعظم عمران خان کی قیادت پر اعتماد کا اظہار کیا، اس موقع پر تیمور سلیم جھگڑا اور کامران بنگش بھی موجود تھے۔
غضنفر بلور اے این پی کے رہنما الیاس بلور کے صاحبزادے ہیں، وہ اے این پی رہنما بشیر بلور اور غلام بلور کے بھتیجے ہیں۔ وہ پاکستان فیڈریشن آف چیمبرز کے سرکردہ رہنما بھی ہیں، وہ سرحد چیمبر آف کامرس اینڈ انڈسٹری کے صدر رہ چکے ہیں۔
واضح رہے کہ 5 دہائیوں کی وابستگی میں بلور خاندان کے اہم فرد نے پہلی مرتبہ اے این پی چھوڑی ہے۔
ترجمان عوامی نیشنل پارٹی ثمر ہارون بلور نے کہا ہے کہ غضنفر بلور غیر سیاسی انسان ہیں، اے این پی کے کسی اہم عہدے پر موجود تھے نہ انہیں کوئی ذمہ داری دی گئی تھی، پارٹی میں شامل بلور خاندان آج بھی پارٹی کے ساتھ چٹان کی طرح کھڑا ہے، اے این پی سے جب تعلق ہی نہیں تو حکمران جماعت تصاویر نکال کر خود کو دھوکا دے رہی ہے۔
غضنفر بلور غیر سیاسی انسان ہیں، اے این پی کے کسی اہم عہدے پر موجود تھے نہ انہیں کوئی ذمہ داری دی گئی تھی،اے این پی میں شامل بلور خاندان آج بھی پارٹی کے ساتھ چٹان کی طرح کھڑا ہے،اے این پی سے جب تعلق ہی نہیں تو حکمران جماعت تصاویر نکال کر خود کو دھوکہ دے رہی ہے
— Samar Haroon Bilour (@SamarHBilour) December 10, 2021
اس ٹویٹ پر جواب دیتے ہوئے کامران بنگش نے کہا کہ بہرحال، میری یادداشت کے مطابق 2013 کے جنرل الیکشنز میں غضنفر بلور اے این پی کے ٹکٹ سے ایم پی اے کا الیکشن لڑچکے ہیں اور اچھے خاصے ووٹ لئے تھے تاہم آپ اُس وقت سیاست میں نہیں تھی تو شائد آپ کو علم نہ ہوں
بہرحال، میری یادداشت کے مطابق 2013 کے جنرل الیکشنز میں غضنفر بلور اے این پی کے ٹکٹ سے ایم پی اے کا الیکشن لڑچکے ہیں اور اچھے خاصے ووٹ لئے تھے تاہم آپ اُس وقت سیاست میں نہیں تھی تو شائد آپ کو علم نہ ہوں۔ https://t.co/6HoVZXpnub
— Kamran Bangash (@kamrankbangash) December 10, 2021
