لاہور: (دنیا نیوز) مسلم لیگ (ن) کی ترجمان مریم اورنگزیب نے سیلز ٹیکس ری فنڈز فوری ادا کرنے کا مطالبہ کر دیا، کہتی ہیں ٹریکٹر اور زرعی آلات بنانے والے یونٹس بند ہونا افسوسناک اور ملک کی معیشت کے لئے خطرناک ہے۔
مسلم لیگ (ن) کی ترجمان مریم اورنگزیب کا کہنا تھا کہ ٹریکٹر اور زرعی آلات بنانے والے یونٹس بند ہونے سے ملک کی زراعت اور کسان متاثر ہوں گے، غربت اور بے روزگاری میں مزید اضافہ ہوگا، یہ عمران صاحب کی لائی"ترقی" کے بھیانک ثمرات ہیں ،2 سال سے ایف بی آر سیلز ٹیکس ری فنڈ کرنے میں ناکام ہے۔
ان کا کہناتھا کہ ریونیو بڑھ گیا ہے تو سیلز ٹیکس ری فنڈز کی ادائیگی 2 سال سے کیوں بند ہے؟ اربوں روپے کے سیلز ٹیکس ری فنڈ نہ ہونا عمران صاحب کے دعووں کی نفی ہے ، ملک میں ٹریکٹر کی قیمت بڑھ جائے گی اور ملک کی فوڈ سکیورٹی متاثر ہوگی ، زراعت متاثر ہونے سے خوراک کی قلت اور قیمتوں دونوں میں اضافہ ہوگا۔