کراچی: (دنیا نیوز) پاکستان تحریک انصاف (پی ٹی آئی) کو دھچکا لگ گیا، فیصل واوڈا کی نااہلی کے باعث خالی ہونے والی سیٹ پاکستان پیپلز پارٹی نے جیت لی۔
فیصل واوڈا کی سینیٹ کی خالی نشست پر ضمنی انتخاب کے لیے سندھ اسمبلی میں پولنگ 5 بجے تک جاری رہی۔
پاکستان پیپلز پارٹی کے امیدوار نثار کھوڑو سندھ سے سینیٹر منتخب ہو گئے، انہوں نے 99 ووٹ حاصل کیے۔
میڈیا سے گفتگو کرتے ہوئے وزیراعلیٰ سندھ مراد علی شاہ کا کہنا تھا کہ عدم اعتماد کي تحريک پيش کردی گئی ہے وزيراعظم کو جلد سے جلد نکالنا ہے۔
مراد علی شاہ کا کہنا تھا کہ عمران خان نے لوگوں سے نوکرياں چھين لی ہيں، وزيراعظم کو جو کرنا ہےوہ کريں بعدميں موقع نہيں ملے گا۔ انہوں نے کہا کہ عوام کے ساتھ پی ٹی آئی ارکان بھی وزيراعظم سےناراض ہيں، آج 4پی ٹی آئی کے ارکان نے نثارکھوڑو کو ووٹ ديا ، حکومت کے دن گنے جاچکے ہيں ۔
وزیراعلیٰ سندھ کا کہنا تھا کہ آئين فلورکراس کرنے کی اجازت ديتا ہے،مگرنااہلی کا خدشہ ہے، اليکشن کميشن کا اپنا ووٹ ہوتا تو وہ بھی عدم اعتماد ميں ہماراساتھ ديتا۔
مراد علی شاہ کا کہنا تھا کہ ملک کو کرکٹ گراؤنڈ سمجھ کر تباہ کر ديا گيا، وزيراعظم ساڑھے3سال بعد آج اتحاديوں کے مرکز گئے۔ وزيراعظم کو اتحاديوں سے پہلے ملنا چاہيے تھا۔
واضح رہے کہ دُہری شہریت کے باعث فیصل واوڈا کو نااہل قرار دینے پر یہ نشست خالی ہوئی تھی۔ سال 2018 کے عام انتخابات کے لیے کاغذات نامزدگی کے ساتھ دہری شہریت کے معاملے پر جھوٹا حلف نامہ جمع کروانے پر الیکشن کمیشن آف پاکستان نے حکمران جماعت پاکستان تحریک انصاف کے سینیر رہنما فیصل واوڈا کو نااہل قرار دے دیا تھا۔
اس سے قبل فیصل واوڈا کی نااہلی کے فیصلے کے بعد سینیٹ کی کراچی سے خالی ہونے والی نشست پر ضمنی انتخاب میں پاکستان تحریک انصاف کو دھچکا لگا ہے۔ سینیٹ کی اس نشست کے الیکشن کے بائیکاٹ کے اعلان کے باوجود پی ٹی آئی کے کئی ارکانِ سندھ اسمبلی ووٹ دینے پہنچ گئے۔ پی ٹی آئی رکن دیوان سچل نے اپنا ووٹ کاسٹ کیا تھا۔ پی ٹی آئی کے رکنِ سندھ اسمبلی کریم بخش گبول بھی سندھ اسمبلی پہنچے تھے۔
یاد رہے کہ فیصل واوڈا کی دہری شہریت کے باعث نااہلی کے سبب خالی ہونے والی نشست پر آغا ارسلان کو پی ٹی آئی نے اپنے امیدوار کے طور پر کھڑا کیا گیا تھا۔
واضح رہے کہ پہلے پی ٹی آئی، پھر ایم کیو ایم اور اس کے بعد گرینڈ ڈیمو کریٹک الائنس (جی ڈی اے) کی جانب سے بھی فیصل واؤڈا کی دہری شہریت کے باعث نااہلی کے سبب خالی ہونے والی سینیٹ کی نشست پر آج ہونے والی ووٹنگ میں حصہ نہ لینے کا فیصلہ کیا تھا۔
پی ٹی آئی کی قیادت کی جانب سے اپنی اتحادی جماعتوں ایم کیو ایم اور گرینڈ ڈیموکریٹک الائنس (جی ڈی اے) کے رہنماؤں سے اس حوالے سے رابطہ کر کے ان سے بھی سینیٹ انتخاب میں حصہ نہ لینے کی سفارش کی گئی تھی۔
