اسلام آباد: (دنیا نیوز) نگران وزیر اعظم انوار الحق کاکڑ نے کہا ہے کہ آج بابائے قوم کا 75 واں یوم وفات ہے، پوری قوم آج کے روز قائد اعظم کی برصغیر کے مسلمانوں کے حقوق کیلئے انتھک جدوجہد، دور اندیشی اور قائدانہ صلاحیتوں پر انہیں خراج عقیدت پیش کرتی ہے۔
قائد اعظم محمد علی جناحؒ کے یوم وفات پر اپنے پیغام میں نگران وزیرِ اعظم انوار الحق کاکڑ نے کہا ہے کہ قائد اعظم کی قیادت کے بغیر مسلمانوں کیلئے آزاد ریاست کا خواب کبھی شرمندہ تعبیر نہ ہوتا، ان کی جدوجہد مسلمانوں کی ایک علیحدہ قوم کے طور پر معاشی، معاشرتی، سیاسی، تہذیبی پہچان اور ایک منفرد طرزِ زندگی کو بحال کرنے اور اس حوالے سے ان کو اقوامِ عالم میں ایک نمایاں مقام دلوانے کیلئے تھی۔
یہ بھی پڑھیں: ملک کیلئے مقبول کے بجائے درست فیصلوں پر یقین رکھتے ہیں، نگران وزیراعظم
نگران وزیر اعظم انوار الحق کاکڑ نے مزید کہا ہے کہ قائد اعظم کی زندگی اصول پسندی، آئینی جدوجہد، سیاسی بصیرت، ایمان، اتحاد اور تنظیم کے زریں اصولوں کا عملی نمونہ تھی، ان کے پاکستان میں کسی کو لسانی، طبقاتی، مذہبی اور عددی بنیادوں پر فوقیت حاصل نہیں، پاکستان کا وفاقی آئین قائدِ اعظم کے 14 نکات کی صحیح معنوں میں نمائندگی کرتا ہے۔
انہوں نے کہا کہ آئین کے تحت ہر اکائی کی انفرادی خوبصورتی کو ماند کئے بغیر سب کو یکساں ترقی و خوشحالی کے مواقع حاصل ہیں، پاکستان اس وقت ایک مشکل دور سے گزر رہا ہے، ہمیں آج قائد کے اصولوں پر عمل پیرا ہونے کی ضرورت ہے، بانی پاکستان کو خراجِ عقیدت پیش کرنے کا اس سے بہتر کوئی اور طریقہ نہیں، ہم قائد اعظم کے سنہری اصولوں پر عمل کر کے پاکستان کو اسلامی فلاحی ریاست بنائیں۔
انوار الحق کاکڑ نے مزید کہا ہے کہ ہمیں ہر قسم کے اختلافات کو ختم کر کے مل کر سر زمینِ پاکستان کی ترقی کیلئے دن رات محنت کرنی ہے، عہد کی تجدید کریں کہ ہم اتحاد، تنظیم اور یقین محکم کے ساتھ آگے بڑھیں گے، الله تعالیٰ بابائے قوم کے درجات بلند کرے، اللہ پاک ہمیں انکے بتائے ہوئے زریں اصولوں پر عمل کرنے کی توفیق دے۔
