اسلام آباد: (دنیا نیوز) صدرِ مملکت آصف علی زرداری نے فرنٹیئر کانسٹیبلری ری آرگنائزیشن آرڈیننس 2025 جاری کر دیا ہے، جس کے تحت فرنٹیئر کانسٹیبلری کو ملک گیر وفاقی فورس میں تبدیل کر دیا گیا ہے۔
صدر مملکت کی جانب سے آرڈیننس جاری ہونے کے بعد اب یہ فورس فیڈرل کانسٹیبلری کہلائے گی، جس کا دائرہ کار چاروں صوبوں، اسلام آباد، آزاد جموں و کشمیر اور گلگت بلتستان تک بڑھا دیا گیا ہے۔
آرڈیننس کے تحت ایف سی ایکٹ 1915 میں اہم ترامیم کی گئی ہیں، نئے قانون کے مطابق فیڈرل کانسٹیبلری کے انسپکٹر جنرل کا تقرر وفاقی حکومت کرے گی جبکہ فورس کے ہر ڈویژن میں ایک ونگ کمانڈر تعینات کیا جائے گا، جس کا رینک ڈپٹی انسپکٹر جنرل کے برابر ہو گا۔
فیڈرل کانسٹیبلری کی تنظیم نو کے تحت فورس کو دو بڑے ڈویژنوں سکیورٹی ڈویژن اور فیڈرل ریزرو ڈویژن میں تقسیم کیا جائے گا، اس فورس کی بنیادی ذمہ داریوں میں فسادات پر قابو پانا، داخلی سلامتی، انسداد دہشت گردی اور اہم شخصیات یا مقامات کا تحفظ شامل ہوگا۔
آرڈیننس کے مطابق ملک بھر میں فیڈرل کانسٹیبلری کی بھرتیوں کے لیے دفاتر قائم کیے جائیں گے جبکہ کمانڈ کی ذمہ داری پولیس سروس آف پاکستان کے افسران کے سپرد ہو گی، وفاقی حکومت قانون و انصاف کی بہتری اور امن و امان کی بحالی کے لیے وفاقی ریزرو فورس بھی بھرتی کر سکے گی۔
وزیر مملکت برائے داخلہ طلال چودھری نے کہا ہے کہ فیڈرل کانسٹیبلری کو تنخواہ وفاقی حکومت دے گی، چاروں صوبوں سے اہلکار بھرتی کیے جائیں گے۔
طلال چوہدری کا کہنا ہے کہ ایف سی کی تربیت سے متعلق اقدامات کر رہے ہیں، قیام امن کے لیے ایف سی کا خصوصی کردار ہو گا، ایف سی میں پورے پاکستان سے لوگ بھرتی کیے جائیں گے، ایف سی میں عصر حاضر کے تقاضوں کے مطابق نئے ونگز بنائے جائیں گے۔
