لاہور: (دنیا نیوز) پنجاب میں حالیہ مون سون بارشوں سے جاں بحق افراد کی تعداد 135 ہوگئی جبکہ سیکڑوں افراد زخمی ہوگئے۔
پنجاب ڈیزاسٹر مینجمنٹ اتھارٹی (پی ڈی ایم اے) نے مون سون فیکٹ شیٹ جاری کر دی، مون سون بارشوں سے ہونے والے نقصانات سے متعلق اعداد وشمار بھی رپورٹ میں شامل ہے۔
رپورٹ کے مطابق رواں سال پنجاب میں مون سون بارشوں کے باعث 135 شہری جاں بحق اور 479 زخمی ہوئے، جبکہ بارشوں کے باعث 156 گھر متاثر ہوئے، زیادہ اموات کچے مکانات، خستہ عمارتوں اور چھتوں کے گرنے کے باعث ہوئیں، آسمانی بجلی گرنے، کرنٹ لگنے اور دریاؤں میں نہاتے ہوئے ڈوبنے سے شہری جاں بحق ہوئے۔
ڈی جی پی ڈی ایم اے کے مطابق 24 گھنٹوں میں پنجاب کے کسی شہر میں بارش ریکارڈ نہیں ہوئی تاہم مون سون بارشوں کا چوتھا سپیل آج شام سے شروع ہونے کا امکان ہے، لاہور، سیالکوٹ، فیصل آباد اور گوجرانوالہ میں مون سون بارشوں سے اربن فلڈنگ کا خدشہ ہے۔
عرفان علی کاٹھیا نے کہا کہ پنجاب کے بیشتر دریاؤں اور بیراجز میں پانی کا بہاؤ نارمل سطح پر ہے، دریاؤں، نہروں اور برساتی نالوں میں نہانے پر مکمل پابندی عائد ہے۔
ترجمان پی ڈی ایم اے کا کہنا تھا کہ دریائے سندھ میں تربیلا چشمہ اور تونسہ کے مقام پر درمیانے درجے کی سیلابی صورتحال ہے، ممکنہ سیلابی خطرے کے پیشِ نظر پی ڈی ایم اے کے انتظامات مکمل ہیں۔
