اسلام آباد:(دنیا نیوز) وزیراعظم کے مشیر برائے بین الصوبائی رابطہ رانا ثنا اللہ نے کہا ہے کہ قومی سیاحتی پالیسی کے فریم ورک پر مل کر کام کرنا ہوگا۔
وفاقی دارالحکومت وزیراعظم کے مشیر برائے بین الصوبائی رابطہ رانا ثنااللہ کی زیر صدارت سیاحت پر اہم اجلاس ہواجس میں قومی سیاحتی پالیسی پر غور کیا گیا، اجلاس میں وزیراعظم کے قومی کوآرڈینیٹر برائے سیاحت سردار یاسر الیاس خان ،سیکرٹری برائے بین الصوبائی رابطہ، محی الدین وانی اور منیجنگ ڈائریکٹر گرین ٹورازم سردار اظہر حیات سمیت دیگر اعلی حکام بھی شریک ہوئے۔
اجلاس کے اعلامیہ کے مطابق رانا ثنا اللہ نے تمام سٹیک ہولڈرز کو قومی سیاحتی پالیسی کے فریم ورک پر مل کر کام کرنے کی ہدایت کی ہے، ان کا کہنا تھا کہ وزیراعظم پاکستان میں سیاحت کے فروغ کے لیے بہت سنجیدہ ہیں، قومی سیاحتی پالیسی کے نفاذ سے صوبے وفاق سے تعاون کریں گے۔
مشیر برائے بین الصوبائی رابطہ نے کہا کہ ملک میں ٹورازم کے حوالے سے معاملات مختلف محکموں میں پھیلے ہوئے ہیں۔
اعلامیہ میں بتایا گیا کہ اجلاس میں گفتگو کرتے ہوئے سردار یاسر الیاس کا کہنا تھا سیاحت کے امور کو متحدہ فریم ورک میں لانے کے لیے کام جاری ہے، ابتدا میں مذہبی، طبی، زرعی اور ایڈونچر ٹورازم پر توجہ دی جا رہی ہے۔
انہوں نے کہا کہ قومی سیاحتی پالیسی کے نفاذ کے لیے مرکزی ادارہ بنایا جائے گا،مرکزی ادارے کے قیام سے سیاحتی پالیسی پر عمل کرنا آسان ہو گا، ستمبر میں وزارت بین الصوبائی رابطہ کے تحت قومی سیاحتی و سرمایہ کاری ایکسپو کا انعقاد ہوگا۔
وزیراعظم کے قومی کوآرڈینیٹر برائے سیاحت کا مزید کہنا تھا کہ قومی سیاحتی ایکسپو ملک میں سیاحت اور سرمایہ کاری کے فروغ میں کلیدی کردار ادا کرے گا، ملک میں سیاحت بڑھانے کے لیے ادارتی اور ریگولیٹری اصلاحات ناگزیر ہیں۔
دوسری جانب رانا ثناء اللہ نے سٹیک ہولڈرز کو دو ہفتوں میں قومی سیاحتی پالیسی کا کام مکمل کرنے کی ہدایت ہے۔
