نیویارک: (ویب ڈیسک) پاکستان نے اقوام متحدہ کی سلامتی کونسل میں جنوبی سوڈان کی بگڑتی ہوئی سیاسی و سلامتی کی صورتحال پر گہری تشویش کا اظہار کیا ہے۔
اقوام متحدہ میں پاکستان کے مستقل سفیر عاصم افتخار احمد نے جنوبی سوڈان کی صورتحال پر سلامتی کونسل کے اجلاس سے خطاب کرتے ہوئے کہا کہ 2018ء کے تجدید شدہ امن معاہدہ ہی امن کی بنیاد ہے اور اس کی خلاف ورزی موجودہ بحران کو مزید گہرا کر سکتی ہے، انہوں نے فوری طور پر جنگ بندی، 2018 کے تجدید شدہ امن معاہدے کی پاسداری، اور تمام فریقین کے درمیان دوبارہ مذاکرات کی بحالی پر زور دیا ہے۔
عاصم افتخار نے کہا کہ جنوبی سوڈان میں سیاسی و سلامتی کا ماحول اُس وقت پسپائی اختیار کر رہا ہے جب اسے آگے بڑھنا چاہئے، انہوں نے زور دیا کہ تمام سیاسی قیدیوں کو فوری طور پر رہا کیا جائے، کیونکہ اعتماد اور شمولیت ہی دیرپا امن کی کنجی ہیں۔
انہوں نے کہا کہ 2026ء کے آخر میں متوقع انتخابات امن کی ایک کرن ہیں، مگر شفاف اور قابلِ اعتبار انتخابات کے لیے بین الاقوامی تعاون کے ساتھ ساتھ مقامی سطح پر اعتماد اور جامعیت کا ماحول بھی ضروری ہے۔
عاصم افتخار نے جنوبی سوڈان میں انسانی بحران کو ’’سنگین‘‘قرار دیتے ہوئے کہا کہ مسلح تنازعات، موسمیاتی تبدیلیوں، ہیضے کی وباء اور ہمسایہ ملک سوڈان کی صورتحال کے اثرات نے لاکھوں افراد کو خطرے سے دوچار کر دیا ہے۔
پاکستانی مندوب نے اقوام متحدہ کے امن مشن (یو این ایم آئی ایس ایس ) کو ’’زندگی کی ڈور‘‘ قرار دیتے ہوئے پاکستانی امن فوجیوں کی خدمات کو سراہا۔
