لاہور:(دنیا نیوز) خیبر پختونخوا میں قومی سطح پرمون سون شجرکاری مہم 2025 کا اجراءکردیا۔
وزیر اعلی خیبر پختونخوا علی امین گنڈاپور نے سول سیکرٹریٹ پشاور کے سبزہ زار میں پوادا لگا کر قومی مہم کا افتتاح کیا، قومی سطح پر شجرکاری کی یہ مربوط مہم اگست سے اکتوبر تک جاری رہے گی۔
خیبر پختونخوا حکومت کی جانب سے اِس شجرکاری مہم کےلئے ہفتہ وار تھیمز مقرر کئے گئے ہیں، قومی مون سون شجرکاری مہم 2025 کے تحت اگست کے آخری ہفتے میں بھی صوبہ بھر میں شجرکاری کا اہتمام کیا گیا ہے۔
اس موقع پر گفتگو کرتے ہوئے علی امین گنڈا پور کا کہنا تھا کہ شجرکاری ایک قومی فریضہ اور وقت کی اشد ضرورت ہے، صوبائی حکومت عمران خان کے ویژن کے مطابق جنگلات کے فروغ اور تحفظ کے لئے مربوط اقدامات اٹھار ہی ہے۔
انہوں نے کہا کہ بلین ٹری پراجیکٹ کی شاندار کامیابی کے بعد اب موجودہ صوبائی حکومت بلین ٹری پلس پراجیکٹ کے تحت بڑے پیمانے پر شجرکاری کر رہی ہے، موسمی تبدیلیوں کے حالیہ تباہ کن اثرات سے بچنے کے لئے بڑے پیمانے پر شجرکاری ناگزیر یے۔
وزیر اعلیٰ خیبر پختونخوا کا مزید کہنا تھا کہ معاشرے کے تمام طبقے زیادہ سے پودے لگانے کے لئے آگے آئیں اور اس اہم قومی فریضہ میں اپنا کردار ادا کریں۔
