نیویارک: (دنیا نیوز) پاکستانی مستقل مندوب عاصم افتخار نے کہا کہ سلامتی کونسل کی دہشت گردوں کی فہرست میں شامل تمام افراد مسلمان ہی کیوں ہیں؟۔
پاکستانی مستقل مندوب عاصم افتخار نے اقوام متحدہ کی سلامتی کونسل کے اجلاس سے خطاب کرتے ہوئے کہا کہ سمجھ سے بالاتر اور قطعاً ناقابل قبول ہے کہ فہرست میں ایک بھی غیر مسلم دہشت گرد موجود نہیں، یہ صورتحال تبدیل ہونی چاہیے۔
عاصم افتخار نے کہاکہ غیر مسلم انتہا پسند اور دہشت گرد اکثر احتساب سے بچ نکلتے ہیں، ٹی ٹی پی، بلوچ لبریشن آرمی، مجید بریگیڈ کا تعاون علاقائی اور بین الاقوامی امن کیلئے شدید خطرہ ہیں۔
انہوں نے کہا کہ افغان عبوری حکومت داعش خراسان کے خلاف کارروائیاں کر رہی ہے، تاہم فتنہ الخوارج، ٹی ٹی پی اور بلوچ عسکریت پسند گروہ افغانستان کے غیر حکومتی علاقوں میں تاحال پناہ لئے ہوئے ہیں۔
