کوئٹہ: (دنیا نیوز) بلوچستان ہائیکورٹ کے حکم پر کوئٹہ میں موبائل فون انٹرنیٹ ڈیٹا سروس جزوی طور پر بحال ہونا شروع ہوگئی۔
بلوچستان ہائیکورٹ کے چیف جسٹس روزی خان بڑیچ اور جسٹس سرداراحمد حلیمی نے موبائل فون انٹرنیٹ سروس کی معطلی کے خلاف آئینی درخواست پر سماعت کی، اس سلسلے میں متعلقہ حکام عدالت میں پیش ہوئے۔
حکام نے عدالت کو بتایا کہ کہ عدالتی حکم نامے کے بعد کوئٹہ شہر میں موبائل فون انٹرنیٹ ڈیٹا سروس بحال ہونا شروع ہوگئی ہے تاہم صوبے کے دیگر شہر اب بھی موبائل انٹرنیٹ سروس سے محروم ہیں۔
یاد رہے کہ ہائیکورٹ نے متعلقہ حکام کو حکم دیا تھا کہ کوئٹہ میں موبائل فون انٹرنیٹ ڈیٹا سروس 2 گھنٹےمیں بحال کریں، عدالتی حکم کے بعد کوئٹہ میں 16 روز سے بند موبائل فون انٹرنیٹ سروس بحال ہونا شروع ہوگئی۔
واضح رہے کہ کوئٹہ سمیت بلوچستان بھرمیں موبائل فون انٹرنیٹ سروس 6 اگست سے معطل تھی جس کے خلاف چیئرمین کنزیومر سوسائٹی خیر محمد نے درخواست دائر کر رکھی تھی۔
