لاہور: (دنیا نیوز) بھارتی آبی جارحیت کے نتیجے میں دریائے ستلج میں پانی کی سطح میں خطرناک حد تک اضافہ ہوگیا ہے، جس کے باعث قصور کے کئی دیہات متاثر ہو چکے ہیں اور حفاظتی بند ٹوٹنے کی اطلاعات موصول ہوئی ہیں۔
ضلعی انتظامیہ کے مطابق ہیڈ گنڈا سنگھ والا کے مقام پر دریائے ستلج میں پانی کی سطح 20.20 فٹ تک پہنچ گئی ہے جبکہ پانی کا بہاؤ ایک لاکھ 1 ہزار 395 کیوسک تک ریکارڈ کیا گیا ہے۔
پانی کی اس غیر معمولی سطح نے علاقے میں تباہی مچا دی ہے، سیکڑوں ایکڑ زرعی اراضی پانی کی لپیٹ میں آ چکی ہے اور خطرات مزید بڑھ گئے ہیں، متعدد مقامات پر حفاظتی بند ٹوٹ چکے ہیں، جس کے نتیجے میں مقامی آبادی کو شدید خطرات لاحق ہو گئے ہیں۔
ضلعی انتظامیہ نے فوری طور پر دریا کے کنارے آباد تمام علاقوں کو خالی کرنے کی ہدایت جاری کر دی ہے اور انخلا کے عمل کو تیز کرنے کیلئے پولیس کی مدد طلب کر لی گئی ہے۔
یہ خبر بھی پڑھیں: بھارت نے دریائے ستلج میں پانی چھوڑ دیا، اونچے درجے کے سیلاب کا خدشہ
ڈپٹی کمشنر عمران علی کا کہنا ہے کہ تمام شہریوں کو محفوظ مقامات پر منتقل ہونا چاہئے، پانی کی سطح مسلسل بلند ہو رہی ہے، ہر فرد کو انخلا کے عمل میں اپنا کردار ادا کرنا ہو گا، انہوں نے یہ بھی انکشاف کیا کہ ماضی میں بھارت دریائے ستلج میں پانی چھوڑنے سے متعلق کم از کم 18 گھنٹے پہلے اطلاع دیتا تھا، مگر اس سال تاحال کوئی اطلاع یا رابطہ نہیں کیا گیا۔
انتظامیہ نے مقامی لوگوں سے اپیل کی ہے کہ وہ فوری طور پر محفوظ مقامات پر منتقل ہو جائیں اور ضلعی حکومت سے تعاون کریں تاکہ کسی بڑے نقصان سے بچا جا سکے۔
