اسلام آباد: (دنیا نیوز) بھارتی ہائی کمیشن کا پاکستانی حکام سے تیسرا رابطہ، دریائے ستلج میں پانی کے بہاؤ کے حوالے سے معلومات فراہم کیں۔
معلومات کے مطابق بھارتی شہر فیروز پور کے قریب دریائے ستلج میں اونچے درجے کا سیلاب ہے، سیلاب کا سرا آئندہ 10 سے 12 گھنٹوں میں گنڈا سنگھ والا کے مقام پر پہنچ سکتا ہے۔
دوسری جانب بھارت کی طرف سے مادھوپر ڈیم سے پانی کے اخراج کی وارننگ جاری کی گئی ہے، ہماچل پردیش، اتراکھنڈ، پنجاب اور مقبوضہ جموں و کشمیر سمیت بھارتی ریاستوں میں جاری شدید بارشیں متوقع ہیں۔
نیشنل ایمرجنسی آپریشن سینٹر صورتحال کا ہمہ وقت مشاہدہ کر رہا ہے، اگلے 48 گھنٹوں میں، دریائے راوی میں جسرکے مقام پر 80 ہزار سے 1 لاکھ 25 ہزار کیوسک بہاؤ کے ساتھ اونچے درجے کی سیلابی صورتحال متوقع ہے۔
چناب کے بالائی علاقوں میں جموں تاوی اور منور تاوی ندیوں کے بہاؤ میں بھی اضافہ ہو رہا ہے، دریائے چناب میں مرالہ کے مقام پر1 لاکھ 50 ہزار سے 2 لاکھ کیوسک کے ساتھ بہاؤ درمیانے درجے سے اونچے درجے تک پہنچ سکتا ہے۔
دریائے ستلج گنڈا سنگھ والا کے مقام پر 1 لاکھ 90 ہزار کیوسک سے 2 لاکھ 20 ہزار کے ساتھ شدید بہاؤ کی حد تک پہنچ سکتا ہے۔
بھارتی ڈیم تھین (رنجیت ساگر) اپنی گنجائش کے قریب تک بھر چکا ہے اور ایئک، ڈیگ، بین، بسنتر، اور پلکھو نالوں سے اخراج اور بہاؤ میں بھی اضافہ متوقع ہے۔
وزیراعظم کی ہدایت پر این ڈی ایم اے روزانہ کی بنیاد پراعلیٰ سطحی مون سون جائزہ اجلاس منعقد کر رہا ہے اور این ای او سی تمام دستیاب وسائل کے ساتھ صورتحال کی ہمہ وقت نگرانی کر رہا ہے۔
این ڈی ایم اے اداروں کو ضروری معاونت فراہم کر رہا ہے تا کہ کسی بھی ممکنہ ہنگامی صورتحال کے لیے بر وقت اور پیشگی اقدامات کیئے جا سکیں۔
