پشاور: (دنیا نیوز) وزیراعلیٰ خیبر پختونخوا علی امین گنڈاپور کے بھائی فیصل امین گنڈا پور نے قومی اسمبلی کی 3 قائمہ کمیٹیوں کی رکنیت سےاستعفیٰ دے دیا۔
رکن قومی اسمبلی فیصل امین گنڈا پور نے استعفے سے متعلق سپیکر قومی اسمبلی کو خط بھیج دیا جس میں فیصل امین نے کہا ہے کہ وہ پاکستان تحریک انصاف (پی ٹی آئی) کے بانی عمران خان کی ہدایت پر سٹینڈنگ کمیٹیوں کی رکنیت سے مستعفی ہورہے ہیں۔
یاد رہے کہ گزشتہ روز پاکستان تحریک انصاف کے بانی عمران خان نے پارٹی کو قومی اسمبلی کی تمام کمیٹیوں سے مستعفی ہونے اور ضمنی انتخابات کے بائیکاٹ کی ہدایت کی تھی۔
اڈیالہ جیل کے باہر میڈیا سے گفتگو کرتے ہوئے علیمہ خان کا کہنا تھا کہ بانی پی ٹی آئی نے پارٹی کو ہدایات دی ہیں کہ قومی اسمبلی کی تمام کمیٹیوں سے مستعفی ہو جائیں۔
علیمہ خان نے مزید کہا تھا کہ بانی پی ٹی آئی نے ضمنی انتخابات کے حوالے سے بیرسٹر گوہر اور سلمان اکرم راجہ کو ہدایات دیں اور کہا کہ ضمنی انتخابات میں حصہ لیکر ان انتخابات کو قانونی جواز فراہم نہیں کرنا چاہیے۔
