گورودوارہ کرتارپور صاحب سے 30 افراد کو ریسکیو کر لیا گیا: رمیش سنگھ اروڑہ

Published On 27 August,2025 05:19 pm

نارووال: (دنیا نیوز) صوبائی وزیر اقلیتی امور رمیش سنگھ اروڑہ نارووال پہنچ گئے، رمیش سنگھ اروڑہ نے بارشوں اور سیلاب سے متاثرہ علاقوں کا دورہ کیا۔

صوبائی وزیر اقلیتی امور رمیش سنگھ اروڑہ نے کہا کہ گورودوارہ کرتارپور صاحب میں بروقت کارروائیوں سے 30 افراد کو ریسکیو کر لیا گیا۔

انہوں نے کہا کہ باقی متاثرہ افراد کو بھی جلد محفوظ مقامات پر منتقل کر دیا جائے گا، ذاتی طور پر امدادی کارروائیوں کی نگرانی کر رہا ہوں۔

رمیش سنگھ اروڑہ کا کہنا تھا کہ وزیراعلیٰ پنجاب اور چیف سیکرٹری پنجاب کا شکریہ ادا کرتا ہوں، حکومت پنجاب کی بروقت امدادی کارروائیوں سے قیمتی جانیں محفوظ رہیں۔

صوبائی وزیر اقلیتی امور نے کہا کہ ریسکیو، پولیس اور ضلعی انتظامیہ سیلاب متاثرین کی مدد میں مصروف ہے، حفاظتی انتظامات کا جائزہ لیا جا رہا ہے۔