لاہور: (دنیا نیوز) بھارت کے چھوڑے گئے پانی سے چناب میں شدید طغیانی سے انتہائی اونچے درجے کا سیلاب آگیا۔
ہیڈ مرالہ پر پانی کی آمد 4 لاکھ 44 ہزار کیوسک ریکارڈ کی گئی، ہیڈ خانکی پر پانی کا بہاؤ 5 لاکھ 58 ہزار کیوسک ہو گیا، ہیڈ تریموں پر بھی اونچے درجے کی سیلابی صورتحال پیدا ہوگئی، پانی کا بہاؤ 2 لاکھ 65 ہزار کیوسک ریکارڈ کیا گیا۔
یہ بھی پڑھیں: دریائے چناب میں متوقع شدید سیلابی ریلوں کی آمد کے حوالے سے الرٹ جاری
سیلابی ریلے نے کوٹ مومن کے علاقے رام دیانہ میں شدید تباہی مچا دی، گورنمنٹ ایلیمنٹری سکول سمیت کئی عمارتیں پانی میں ڈوب گئیں، دریائے چناب میں شور کوٹ کے مقام پر بھی اونچے درجے کا سیلاب آگیا، جھنگ اور ملتان روڈ کے قریبی کئی علاقے زیر آب آگئے، فوج اور ریسکیو ٹیمیں امدادی کارروائیوں میں مصروف رہیں۔
ملتان میں سیلابی ریلے کے باعث دریائی کٹاؤ کے باعث زمینیں دریا برد ہوگئیں، دریائے چناب کا سیلابی پانی پنڈی بھٹیاں کے متعدد علاقوں میں داخل ہوگیا، گورنمنٹ ٹیکنیکل کالج اور تھانہ صدر پولیس پٹرولنگ چوکی بھی زیر آب آگئی۔
یہ بھی پڑھیں: بارش کے باعث 170 قیدی گجرات جیل سے لاہور اور گوجرانوالہ جیل منتقل
چناب کے سیلابی پانی نے جھوک وینس کی متعدد بستیوں میں تباہی مچا دی، چشتیاں میں سیلابی پانی نے پوری بستی کو لپیٹ میں لے لیا، مکینوں نے چھتوں پر چڑھ کر جانیں بچائیں۔
ہیڈ اسلام پر پانی کی سطح پھر بلند ہونے لگی، مزید کئی بستیاں زیر آب آگئی، وہاڑی میں 15 سے زائد سرکاری سکول ریلوں کی نذر ہو چکے۔
