پشاور: (ذیشان کاکا خیل) پشاور ہائیکورٹ نے خواجہ سرا کی جانب سے پولیس کے خلاف دائر درخواست پر آئی جی پولیس سے رپورٹ طلب کر لی۔
سماعت جسٹس سید ارشد علی اور جسٹس فہیم ولی نے کی، عدالت نے آئی جی خیبر پختونخوا سے 14 روز میں رپورٹ طلب کر لی۔
درخواست گزار کے وکیل نے عدالت کو آگاہ کیا کہ صوبے بھر کے خواجہ سرائوں کے ساتھ پولیس کا رویہ ٹھیک نہیں، خواجہ سرا بھی اس ملک کے شہری ہیں، ان کے بھی بنیادی حقوق ہیں، پولیس خواجہ سراؤں کو بے جا تنگ کر رہی ہے۔
وکیل نے عدالت عالیہ کو یہ بھی بتایا کہ پشاور اور صوابی کے خواجہ سراؤں کو ضلع بدر کیا جا رہا ہے، خواجہ سراؤں کا قتل ہو رہا ہے ، پولیس تحفظ دینے میں ناکام ہوئی ہے۔
پشاور ہائیکوٹر نے آئی جی پولیس سے رپورٹ طلب کرتے ہوئے سماعت ملتوی کردی۔
