پشاور:(دنیا نیوز) خیبرپختونخوا کے دارالحکومت پشاور اور گردونواح کے علاقوں میں شدید بارش کےنتیجے میں شہر میں اربن فلڈنگ پیدا ہوگئی۔
موسلا دھار بارش کے باعث شہر اور نواحی علاقوں کی سڑکیں تالاب میں تبدیل ہو گئیں، جی ٹی روڈ، اشرف روڈ، کوہاٹی، ہشتنگری، سکندرپورہ، گلہار، ورسک روڈ، ناصر باغ روڈ اور ریگی ماڈل ٹاؤن سمیت کئی علاقے پانی میں ڈوب گئے۔
گزشتہ روز سب سے زیادہ بارش چِراٹ میں 165 ملی میٹر ریکارڈ کی گئی، پشاور شہر میں 41 ملی میٹر اور ایئرپورٹ کے علاقے میں 35 ملی میٹر بارش ہوئی، ماہرین نے انتباہ جاری کیا ہے کہ بارش کا سلسلہ صوبے بھر میں 3 سے 4 ستمبر تک جاری رہنے کا امکان ہے۔
دوسری جانب ڈائریکٹر جنرل پی ڈی ایم اے خیبرپختونخوا اسفندیار خٹک نے متاثرہ علاقوں کا دورہ کیا اور مقامی عوام کو ہر ممکن تعاون کی یقین دہانی کروائی۔
پی ڈی ایم اے خیبر پختونخوا کی جاری کردہ رپورٹ کے مطابق ڈی جی نے متاثرہ مقامات پر ریسکیو اور نکاسی آب کے جاری آپریشنز کا جائزہ لیا اور اربن فلڈنگ سے متاثرہ علاقوں میں کلیئرنس اور ریسکیو سرگرمیوں کی نگرانی کی۔
ترجمان پی ڈی ایم اے نے بتایا کہ 50 سے زائد ڈی واٹرنگ پمپس اور مشینری مختلف مقامات پر تعینات کی گئی ہیں جو متاثرہ علاقوں سے پانی کی نکاسی میں مصروف ہیں، متعلقہ محکمے اور ڈسٹرکٹ انتظامیہ پانی کی نکاسی کے عمل کو تیز کرنے میں بھرپور کوشش کر رہے ہیں۔
ترجمان کا مزید کہنا تھا کہ ڈی جی ریسکیو اور ڈی جی پی ڈی ایم اے مل کر متاثرہ علاقوں میں ریلیف سرگرمیوں کی مشترکہ نگرانی جاری رکھے ہوئے ہیں تاکہ شہریوں کو بروقت مدد فراہم کی جا سکے۔
