دہشتگرد شہریوں کو نشانہ بنا رہے، ریاستی رٹ چیلنج نہیں ہونے دینگے: وزیراعلیٰ بلوچستان

اسلام آباد: (دنیا نیوز) وزیراعلیٰ بلوچستان سرفراز بگٹی نے کہا ہے کہ دہشت گرد نہتے شہریوں کو نشانہ بنا رہے ہیں، ریاست کی رٹ کو کسی صورت چیلنج نہیں ہونے دیں گے۔

وفاقی دار الحکومت میں پریس کانفرنس کرتے ہوئے وزیراعلیٰ بلوچستان نے کہا کہ دہشت گردوں کو کسی صورت رعایت نہیں دی جائے گی، گزشتہ روز فورسز نے دہشت گردوں کے خلاف چاغی میں اہم کارروائی کی، دہشتگرد جہانزیب نے ہتھیارڈال دیئے دیگرآپریشن میں مارے گئے۔

سرفراز بگٹی کا کہنا تھا کہ دہشت گرد اہم تنصیبات کو نشانہ بنانا چاہتے تھے، دہشت گرد جہانزیب نے ویڈیو بیان میں مختلف کارروائیوں کا اعتراف کیا، دہشت گردوں کے خلاف سخت ترین فضائی اور زمینی آپریشن ضروری ہے۔

وزیراعلیٰ بلوچستان نے کہا کہ دہشت گرد جہانزیب دالبندین میں ہتھیاراور دیگر مواد سپلائی کرتا تھا، آپریشن کے دوران ایک جوان زخمی ہوا، جلد صحت یابی کے لیے دعاگو ہیں، سکیورٹی فورسز نے دہشت گردوں کی متعدد کارروائیوں کو بروقت ناکام بنایا۔

انہوں نے کہا کہ ہائی ویلیو ٹارگٹ کو پکڑنا فورسز کی اہم کامیابی ہے، افغان حکومت اپنی سرزمین دہشت گردی کے لیے استعمال نہ ہونے دے، انتہا پسند نوجوانوں کو ورغلانے کی کوشش کر رہے ہیں۔

سرفراز بگٹی نے کہا کہ کسی کو بلوچستان کا امن متاثر نہیں کرنے دیں گے، دہشت گردوں کی کمیونیکیشن کو روکنا ضروری ہے، فورجی سروس بند کرنے پر حکومت پر بڑی تنقید ہوئی، انٹرنیٹ سروس بند کرنے کا مقصد دہشت گردی کو کنٹرول کرنا تھا۔

یہ بھی پڑھیں: دہشتگرد بلوچستان کے دشمن، پنجاب سے ترقی پر جھگڑا نہیں: سرفراز بگٹی

وزیراعلیٰ بلوچستان کا کہنا تھا کہ بھارتی ایجنسی ’را‘ پاکستان میں دہشت گردی میں ملوث ہے، پہلے دن سے کہہ رہا ہوں کہ یہ ’را‘ بیسڈ، ’را‘ فنڈڈ جنگ ہے، یہ ’را‘ کی پاکستان پر مسلط کردہ جنگ ہے۔

انہوں نے کہا کہ دہشت گردوں کو ریاست مخالف بیانیہ بنانے میں کامیاب نہیں ہونے دیں گے، فتنہ الہندوستان کے دہشت گرد بلوچستان میں کارروائیوں میں ملوث ہیں، لاپتا افراد سے متعلق ماہ رنگ بلوچ پروپیگنڈا کر رہی ہے۔