ریاض: (دنیا نیوز) جماعت اسلامی کے سابق نائب امیر ڈاکٹر فرید احمد پراچہ نے کہا ہے کہ مسئلہ فلسطین کا پائیدار اور مستقل حل انتہائی ضروری ہے تاکہ مظلوم فلسطینی عوام آزادی اور خودمختاری کے ساتھ اپنی زندگی گزار سکیں۔
سعودی عرب کے دارالحکومت ریاض میں پاکستانی کمیونٹی سے خطاب کرتے ہوئے فرید احمد پراچہ کا کہنا تھا کہ پاکستان کو معاشی طور پر مضبوط بنانے کیلئے ایسی پالیسیوں کی ضرورت ہے جو آئی ایم ایف جیسے اداروں کے دباؤ سے نجات دلائیں اور خود انحصاری کی راہ ہموار کریں۔
انہوں نے افغانستان سے دہشت گردوں کی پاکستان میں دراندازی اور حملوں پر شدید تشویش کا اظہار کرتے ہوئے کہا کہ افغانستان کو اپنی سرزمین دہشت گرد عناصر سے پاک کرنے کیلئے مؤثر اور فوری اقدامات کرنے چاہئیں تاکہ خطے میں امن قائم ہو سکے۔
تقریب میں ریاض میں مقیم پاکستانی کمیونٹی کے افراد نے بڑی تعداد میں شرکت کی اور قومی و بین الاقوامی امور پر ڈاکٹر فرید پراچہ کے مؤقف کو سراہا۔
