مظفرآباد: (دنیا نیوز) سپریم کورٹ آزاد جموں و کشمیر کی جانب سے منعقدہ خصوصی تقریب میں دنیا میڈیا گروپ نے ایک اور اعزاز اپنے نام کر لیا، عدالتی سرگرمیوں کی جامع، مؤثر اور ذمہ دارانہ کوریج پر دنیا نیوز کو خصوصی ایوارڈ سے نوازا گیا۔
تقریب میں چیف جسٹس سپریم کورٹ آزاد جموں و کشمیر جسٹس سعید اکرم راجہ نے دنیا نیوز کو ایوارڈ پیش کیا جو ادارے کی جانب سے سینئر رپورٹر محمد اقبال نے وصول کیا۔
سپریم کورٹ کی جانب سے منعقدہ اس تقریب میں مختلف اداروں کو نمایاں خدمات پر ایوارڈز دیئے گئے ہیں، دنیا نیوز کو عدالتی تقاریب اور قانونی پیشرفت کی بروقت، مستند اور معیاری رپورٹنگ پر خصوصی شیلڈ پیش کی گئی۔
چیف جسٹس جسٹس سعید اکرم راجہ نے اپنے خطاب میں دنیا نیوز اور روزنامہ دنیا کے ادارتی بورڈ کے اعلیٰ صحافتی معیار کی تعریف کرتے ہوئے کہا ہے کہ عدالتی رپورٹنگ میں ذمہ داری، درستگی اور شفافیت کا مظاہرہ قابل تحسین ہے۔
واضح رہے کہ دنیا میڈیا گروپ کیلئے یہ ایوارڈ صحافتی معیارات، ذمہ داری اور پیشہ ورانہ خدمات کے اعتراف میں ایک اور نمایاں سنگ میل ہے۔
