اسلام آباد: (اے پی پی) پاکستان سائیکلنگ فیڈریشن کے زیر اہتمام عالمی روڈ سائیکلنگ چیمپئن شپ کےلئے قومی ٹیم کے کھلاڑیوں کے انتخاب کے لئے ٹرائلز ہفتہ کو اسلام آباد میں ہوں گے جبکہ 10 اگست کو کراچی میں ہوں گے۔
پاکستان سائیکلنگ فیڈریشن کے صدر سید اظہر علی شاہ نے سرکاری خبر رساں ادارے سے گفتگو کرتے ہوئے بتایا کہ ٹرائلز کی تیاریاں زور و شور پر ہیں اور عالمی روڈ سائیکلنگ کی انفرادی ٹائم ٹرائل چیمپئن شپ رواں سال 20 سے 27 ستمبر تک سوئٹزرلینڈ میں منعقد ہوگی جس میں دنیا بھر سے سائیکلسٹ حصہ لیں گے۔
انہوں نے کہا کہ ایونٹ میں شرکت کےلئے قومی ٹیم کے کھلاڑیوں کے ٹرائلز 8 اگست کو صبح 8 بجے چک شہزاد اسلام آباد میں ہوں گے جس میں اسلام آباد، خیبرپختونخوا اور پنجاب کے کھلاڑیوں حصہ لے سکیں گے جبکہ 10 اگست کو دو دریا، کراچی میں ہوں گے جس میں سندھ اور بلوچستان کے کھلاڑی حصہ لے سکتے ہیں۔
انہوں نے کہا کہ ٹرائلز کے بارے میں فیڈریشن کے ساتھ منسلک تمام ایسوسی ایشنز اور اداروں کو بھی آگاہ کر دیا گیا ہے کہ وہ اپنے، اپنے اچھے سائیکلسٹ کو ٹرائلز کےلئے بھیجیں۔
انہوں نے کہا کہ ٹرائلز کے دوران تین کھلاڑیوں کا چناﺅ کیا جائے گا اور عالمی سائیکلنگ چیمپئن شپ میں دو کھلاڑی پاکستان کی نمائندگی کریں گے جبکہ ایک کھلاڑی کو اضافی طور پر رکھا جائے گا۔
