نیویارک: (دنیا نیوز) امریکی تیراک کیٹی لیڈیکی نے ایک بار پھر اپنی غیر معمولی مہارت کا مظاہرہ کرتے ہوئے 800 میٹر فری سٹائل میں اپنا ہی عالمی ریکارڈ توڑ ڈالا۔
انہوں نے 2016ء کے ریو اولمپکس میں آخری بار عالمی ریکارڈ بنایا تھا اور اب تقریباً 10 سال بعد کیٹی نے اسے مزید بہتر بنا کر ایک بار پھر دنیا کو حیران کردیا، ٹی وائے آر پرو سوئم سیریز کے دوران لیڈیکی نے نیا وقت 8:04 ریکارڈ کیا، جو کہ ان کے گزشتہ عالمی ریکارڈ سے 0.6 سیکنڈ کم ہے۔
دلچسپ بات یہ ہے کہ وہ اپنی قریبی حریف سے تقریباً 20 سیکنڈز آگے تھیں، کیٹی لیڈیکی گزشتہ 13 برسوں سے طویل فاصلے کی فری سٹائل تیراکی پر راج کر رہی ہیں، ان کی رفتار، برداشت اور مہارت ایسی سطح پر ہے کہ اکثر مقابلوں میں وہ صرف خود سے مقابلہ کرتی دکھائی دیتی ہیں۔
انہوں نے 1500 میٹر فری سٹائل میں تاریخ کا دوسرا تیز ترین وقت (15:24.51) مکمل کر کے واضح کیا کہ وہ اب بھی دنیا کی سب سے عظیم تیراک ہیں۔
ریکارڈ کے بعد لیڈیکی نے کہا کہ میں مسکرانا نہیں روک پا رہی، یہ سارا ہفتہ ایسا ہی رہا ہے، اس لئے میرے لئے کچھ نیا نہیں، یہ کئی برسوں کی محنت کا نتیجہ ہے اور اب یہ حاصل کرنا ناقابل یقین ہے۔
ان کا مزید کہنا تھاکہ 750 میٹر کے ٹرن پر جب ہجوم نے شور مچایا تو میں نے خود سے کہا یہ موقع ہاتھ سے نہیں جانے دینا اور میں نے جدوجہد شروع کر دی۔
