گلگت: (دنیا نیوز)جرمنی کی لاپتہ سابق اولمپک چیمپئن اور کوہ پیما لاؤرا ڈالمائر کے انتقال کی تصدیق کر دی گئی ہے، کوہ پیما کی تلاش کے لیے گزشتہ 2 روز سے ریسکیو آپریشن جاری تھا۔
الپائن کلب آف پاکستان کے مطابق جرمن کوہ پیما لاؤرا ڈالمائر 28 جولائی کو گلگت بلتستان کی ہوشے ویلی میں واقع لیلیٰ پیک (6,094 میٹر) کو سر کرنے کی کوشش کے دوران اُس وقت حادثے کا شکار ہوئیں، جب وہ تقریباً 5 ہزار 700 میٹر کی بلندی پر گرنے والے پتھروں کی زد میں آ گئیں تھی۔
الپائن کلب نے بتایا کہ حادثے کا شکار ہونے والی سابق اولمپک چیمپئن لاؤرا ڈالمائر کو ریسکیو کرنے کی تمام کوششیں خراب موسم کے باعث ناکام رہیں، اس دوران زخمی کوہ پیما انتقال کر گئی تھیں۔
الپائن کلب کا لاؤرا ڈالمائر کو خراج عقیدت پیش کرتے ہوئے اپنے بیان میں کہنا تھا کہ جرمن کوہ پیما نے اپنی زندگی کا اختتام اسی کام کو انجام دیتے ہوئے کیا۔
