جوہر بارو: (دنیا نیوز) سلطان آف جوہر ہاکی کپ میں برطانیہ نے پاکستان جونیئر ہاکی ٹیم کو ایک کے مقابلے میں پانچ گول سے شکست دے دی۔
ملائیشیا کے شہر جوہر بارو میں جاری سلطان آف جوہر کپ میں برطانیہ نے شاندار کھیل کا مظاہرہ کیا، پہلے ہی کوارٹر میں اُن کے کھلاڑیوں نے تین گول کرکے ٹیم کی پوزیشن مضبوط کرلی، ہنری میرکھم نے دو اور جونی ہیبٹ نے ایک گول کیا۔
دوسرے کوارٹر میں پاکستان کی جانب سے سفیان خان نے پنالٹی کارنر پر گول کرکے خسارہ کم کیا لیکن اس کے بعد پاکستان جونئیر ٹیم کوئی گول نہ کرسکی، پاکستان ٹیم ملنے والے پنالٹی سٹروک سے بھی فائدہ نہیں اُٹھا سکی جو سفیان خان نے ضائع کردیا۔
تیسرے کوارٹر میں کوئی گول نہیں ہوا، آخری کواٹر میں برطانیہ نے مزید دو گول کر کے پانچ ایک کے سکور سے فتح حاصل کی، پاکستان ٹیم تیسرا میچ منگل کو روایتی حریف بھارت کے خلاف کھیلے گی۔
