لاہور: (روزنامہ دنیا) یوں تو سبز مرچ دیکھنے میں بہت بھلی اور خوبصورت نظر آتی ہے لیکن کھانے سے پتا چلتا ہے کہ اس کا ذائقہ کتنا تیز ہے۔ لیکن ایک بات ہے کہ اگر اس کا استعمال کھانوں میں نہ کیا جائے تو ہمارے کھانے بھی مزیدار نہ ہوں۔
سبز مرچ ہر قسم کے کھانوں میں استعمال کی جا سکتی ہے، دال، حلیم، سبزی اور گوشت میں بھی۔ سبز مرچ پسندیدہ سبزی ہے۔ اس سبزی میں وٹامن سی کی کافی مقدار پائی جاتی ہے۔ وٹامن سی ہماری جلد کے لئے بہت مفید ہے اس سے ہماری جلد ترو تازہ رہتی ہے۔ جن کی جلد کو کسی وجہ سے نقصان پہنچ چکا ہے وہ اپنی خوراک میں وٹامن سی کی زیادہ مقدار والے پھل اور سبزیاں استعمال کریں جیسا کہ یہی سبز مرچ۔ سبز مرچ میں وٹامن A بھی پایا جاتا ہے جو بینائی کے لئے بہترین ٹانک ہے۔ کمزورنظر والے حضرات وٹامن A کی زیادہ مقدار والی سبزیاں اور پھل استعمال کریں۔
سبز مرچ میں B6، تانبہ، پوٹاشیم، فولاد، کاربوہائیدریٹس اور پروٹین بھی پائی جاتی ہے۔ سبز مرچ میں پائے جانے والے تمام اجزاء ہماری صحت کی ضمانت ہیں۔ یہ مرچ جسم کے مدافعتی نظام کو مضبوط بناتی ہے۔ سلاد میں یہ نظام ہاضمہ کو بہتر بناتی ہے۔ جلن سے بچنے کے لئے خواتین اسے کبھی بھی ہاتھ میں پکڑ کر نہ کاٹیں بلکہ ماربل یا لکڑی کے تختے پر رکھ کاٹیں۔
ایک دلچسپ بات، ہری مرچ کے کھانے سے آپ کا موڈ خوشگوار رہتا ہے۔ اس میں موجود Endorphin ہارمونز ہے جو دماغ تک جاتا ہے اس کی وجہ سے ہی آپ کا موڈ اچھا رہتا ہے۔
سبز مرچ کے دیگر قیمتی فوائد
پھیپھڑوں کے کینسر میں سبز مرچ کا استعمال مفید رہتا ہے۔ سبز مرچ ہماری ہڈیوں کو مظبوط اور توانا بناتی ہے۔ اس کے استعمال کرنے سے بڑھتی عمر کے اثرات دیر سے ظاہر ہوتے ہیں۔ یہ چہرے کی جھریوں کا خاتمہ کرتی ہے اور جلد کے لئے بھی مفید ہے۔
سبز مرچ کے استعمال سے قبض کا مرض نہیں ہوتا۔یہ کھانسی میں بھی مفید ہے۔ افعال معدہ کو درست رکھتی ہیں۔ ہیضہ ہو جانے کی صورت میں افاقہ ہوتا ہے۔ یہ کھانا ہضم کرنے میں ہماری مددگار ہے اورجسم سے فالتو چربی کم کر دیتی ہے جس سے وزن کم ہوجاتا ہے۔ اس کے استعمال سے ہمارے جسم میں موجود ٹشو بہتر طور پر کام کرتے ہیں۔سبز مرچ سردی کے موسم میں ٹھنڈک سے بچاتی ہے اور قلب میں تحریک پیدا کرنے کا سبب بنتی ہے۔
تحریر: ڈاکٹر تنویر سرور
