کیلیفورنیا(نیٹ نیوز)گوگل نے موبائل صارفین کو انٹرنیٹ کے بغیر چلنے والی ٹرانسلیشن ایپ کی سہولت متعارف کرا دی۔ تفصیلات کے مطابق گوگل کی جانب سے اینڈرائیڈ اور آئی او ایس صارفین کیلئے ایسی ٹرانسلیشن ایپ متعارف کرائی گئی جو انٹرنیٹ کے بغیر بھی آسانی کیساتھ چلائی جاسکتی ہے۔
قبل ازیں صارفین کو گوگل ٹرانسلیٹ استعمال کرنے کیلئے انٹرنیٹ کی لازمی سہولت درکار ہوتی تھی جس کے باعث بہت سارے لوگ اسے استعمال کرنے سے کتراتے تھے اور وہ انٹرنیٹ کنکشن نہ ہونے کے باعث بے بس ہوتے تھے ۔ترجمان گوگل کے مطابق مذکورہ ایپ کی سروس محدود صارفین کو 13 جون سے فراہم کردی گئی جبکہ آئندہ چند دنوں میں اسے دنیا بھر میں رہنے والے تمام لوگ استعمال کرسکیں گے۔
ایپ میں اردو سمیت 59 زبانوں کو شامل کیا گیا ہے جن کا ترجمہ بغیر انٹرنیٹ آسانی کے ساتھ کیا جاسکے گا۔گوگل کے مطابق عام سمارٹ فون سے بھی اس آن لائن ترجمہ کرنیوالی ایپ کو استعمال کیا جاسکے گا کیونکہ مجموعی طور پر اسکا سائز 30 سے 40 ایم بی ہے ۔ کمپنی کے مطابق امریکہ اور برطانیہ میں رہنے والے صارفین گوگل اور آئی فون سٹور سے ایپ اپنے فون میں انسٹال کر کے استعمال کرسکتے ہیں۔
واضح رہے کہ انٹرنیٹ پر مختلف اداروں اور ویب سائٹس کی جانب سے صارفین کو آن لائن ترجمہ کرنے کی سہولت فراہم کی جاتی ہے تاہم اکثر لوگ ٹرانسلیشن کیلئے گوگل کو ہی ترجیح دیتے ہیں قبل ازیں مائیکروسافٹ نے آئی او ایس صارفین کو آف لائن ترجمے کی سہولت فراہم کی تھی جس کو مدنظر رکھتے ہوئے گوگل نے تمام ہی سمارٹ ڈیوائسز کیلئے خصوصی ایپ تیار کی ہے۔
