ہانگ کانگ: (ویب ڈیسک) نائبل نامی روبوٹ بلی جس کی تشہیر اس وقت کراؤڈ فنڈنگ ویب سائٹ انڈی گو گو پر جاری ہے۔
اسے بنانے والوں کا دعویٰ ہے کہ یہ دنیا کی سب سے ہلکی اور برق رفتار روبوٹ بلی ہے اور اوپن سورس ہونے کی وجہ سے آپ اس میں حسبِ خواہش فیچر شامل کرسکتے ہیں۔
اس کے علاوہ یہ بہت سی باتیں سیکھتی ہے اور رویوں کا اظہار بھی کرتی ہے، یہاں تک کہ رسبری پائی کی بدولت آپ اسے سوچنے سمجھنے والی بلی بھی بنا سکتے ہیں۔
اس کا بنیادی تصور ایک پالتو بلی کا ہی ہے یعنی یہ آپ کی دوست بلی بن جاتی ہے لیکن ایک طویل عرصے تک نت نئے ہنر اور فن سیکھتی رہتی ہے۔
یہ اورڈینو مائیکرو کنٹرولر سے قابو کی جاتی ہے، اس میں شاندار مسل میموری بھی ہے جس سے یہ چھلانگیں لگا سکتی ہے اور نئے کرتب سیکھتی ہے۔
اس کا ہارڈویئر بھی آپ اپنی سہولت سے چھاپ سکتے ہیں کیونکہ اوپن سورس ہونے کی وجہ سے تھری ڈی پرنٹنگ کا ہر پہلو اس کے لیے موافق ثابت ہوتا ہے۔
لیکن اس سادہ ڈیزائن کے باوجود اس کے فریم میں بہت زیادہ اہم گوشے ہیں۔ صرف بلی کے سر کو ہی لیجئے تو اس میں آرجی بی ایل ای ڈی، فاصلہ بتانے والا سینسراور گردن گھمانے والا مشینی نظام موجود ہے،اس کی ایک کٹ کی قیمت 229 امریکی ڈالر ہے جو اب دستیاب ہے۔
