اسلام آباد: (دنیا نیوز) حکومت نے قومی سطح پر مصنوعی ذہانت کی ترقی کا منصوبہ شروع کرنے کا اعلان کر دیا۔
وزارت آئی ٹی کی دستاویز کے مطابق قومی آرٹیفشل انٹیلی جنس منصوبے کے لیے پلاننگ کمیشن نے پی سی ون کی منظوری دے دی ہے اور 53 کروڑ 46 لاکھ روپے مختص کیے گئے ہیں۔
سرکاری دستاویز کے مطابق وزارت آئی ٹی ملک بھر میں اے آئی ہب اور تربیتی مراکز قائم کرے گی، سات شہروں میں نیشنل انکیوبیشن سینٹرز میں اے آئی ہب قائم ہوں گے، 20 ہزار طلبا و طالبات کو اے آئی تربیت دی جائے گی۔
اطلاع ہے کہ 150 اسٹارٹ اپس کو اے آئی گرانٹس دی جائیں گی، 500 پروفیشنلز کو اے آئی تربیت دینے کا ہدف مقرر کیا گیا ہے، 26-2025 ء کے اہداف میں 2 اے آئی ہب، 3 ہزار تربیتی ورکشاپ، 2 آگاہی سیشن منعقد ہوں گے۔
سرکاری دستاویز کے مطابق منصوبے کے تحت شفاف اور منصفانہ اے آئی گورننس کی حکمت عملی اپنائی جائے گی، منصوبہ ڈیجیٹل پاکستان ویژن سے ہم آہنگ ہوگا، اس منصوبے کا مقصد اے آئی اسکلز، تربیت، اور گورننس کو فروغ دینا ہے۔
