کیلیفورنیا: (ویب ڈیسک) انسٹنٹ میسیجنگ ایپلی کیشن واٹس ایپ پر نئے دلچسپ فیچر کی آزمائش کی جا رہی ہے، جس سے صارفین کے سٹیٹس یا سٹوریز کو زیادہ سے زیادہ افراد دیکھ سکیں گے۔
جی ہاں، واٹس ایپ پر ایک ایسے فیچر کو آزمایا جا رہا ہے، جس کے ذریعے کوئی بھی صارف اپنے تمام گروپس کو بھی سٹیٹس میں مینشن کر سکے گا۔
اس وقت واٹس ایپ سٹیٹس پر صارف صرف اپنے دوستوں اور محفوظ کئے گئے نمبرز کو مینشن کر سکتا ہے، گروپس کو مینشن کرنے کا فیچر دستیاب نہیں، لیکن جلد ہی نیا فیچر بھی پیش کر دیا جائے گا۔
واٹس ایپ کی اپڈیٹس پر نظر رکھنے والی ویب سائٹ کے مطابق کمپنی نے نئے فیچر کی محدود آزمائش شروع کر دی۔
فیچر کے تحت صارف کسی بھی گروپ کو سٹیٹس میں مینشن کر سکے گا، جس کے بعد سٹیٹس شیئر ہونے کا نوٹیفکیشن تمام گروپ ممبرز کو چلا جائے گا، فیچر کے تحت گروپ میں شامل تمام ارکان مینشن کئے جانے کے بعد الگ الگ نوٹیفکیشن وصول کریں گے اور وہ نہ صرف سٹیٹس کو دیکھ سکیں گے بلکہ وہ چاہیں تو سٹیٹس یا سٹوری کو ری شیئر بھی کر سکیں گے۔
فیچر کے مطابق گروپ میں شامل وہ افراد بھی نوٹیفکیشن وصول کر پائیں گے، جنہیں صارف نے بلاک کر رکھا ہوگا لیکن چونکہ وہ گروپ کا حصہ ہوں گے، اس لئے وہ فیچر کے تحت نوٹیفکیشن وصول کر پائیں گے اور صارف کا سٹیٹس بھی دیکھ سکیں گے۔
ابھی مذکورہ فیچر تک محدود صارفین کو رسائی دی گئی ہے، بعد میں اس تک زیادہ صارفین کو رسائی دی جائے گی، جس کے بعد اسے پیش کئے جانے کا امکان ہے۔
ممکنہ طور پر مذکورہ فیچر کو آئندہ چند ماہ میں عام صارفین کیلئے پیش کر دیا جائے گا، تاہم اس حوالے سے کچھ بھی کہنا قبل از وقت ہے۔
