وفاقی کابینہ نے پاکستان ورچوئل اثاثہ جات ریگولیٹری اتھارٹی کے قیام کی منظوری دے دی

Published On 07 July,2025 10:36 pm

اسلام آباد: (دنیا نیوز) پاکستان کی وفاقی کابینہ نے پاکستان ورچوئل اثاثہ جات ریگولیٹری اتھارٹی (PVARA) کے قیام کی سمری کی باضابطہ منظوری دے دی ہے۔

یہ فیصلہ ملک کے تیزی سے ترقی پذیر ڈیجیٹل اثاثوں کے شعبے کی نگرانی کے لیے ایک جامع قانونی و ادارہ جاتی فریم ورک کے قیام کی جانب ایک تاریخی قدم ہے۔

مجوزہ اتھارٹی ایک خودمختار ریگولیٹر کے طور پر کام کرے گی جو ورچوئل اثاثہ جات کی خدمات فراہم کرنے والے اداروں (VASPs) کو لائسنس جاری کرنے، ان کی نگرانی کرنے، اور مکمل طور پر FATF کے رہنما اصولوں اور عالمی معیار سے ہم آہنگ ضوابط پر عمل درآمد کی ذمہ دار ہوگی۔

یہ پیش رفت پاکستان کرپٹو کونسل (PCC) کے 14 مارچ 2025 کو قیام کے محض چار ماہ بعد سامنے آئی ہے، جو پاکستان کے ڈیجیٹل فنانس کے نئے دور کی شروعات تھی۔

فنانس منسٹر محمد اورنگزیب کی سربراہی اور وزیراعظم کے معاون خصوصی برائے بلاک چین و کرپٹو، بلال بن صاقب (وزیر مملکت کے عہدے کے ساتھ) کی قیادت میں PCC نے ملک گیر سطح پر بلاک چین ٹیکنالوجی، ڈیجیٹل کرنسیوں اور ٹوکنائزڈ اثاثوں کے ضابطہ بندی شدہ اور جدیدیت دوست فروغ کے لیے راہ ہموار کی۔