کیلیفورنیا: (ویب ڈیسک) ٹیسلا اور سپیس ایکس کے سی ای او ایلون مسک کی کمپنی سٹار لنک کی انٹرنیٹ سروس میں ایک بار پھر خلل پیدا ہوا ہے جس کے باعث امریکا میں ہزاروں صارفین متاثر ہوگئے ہیں۔
غیر ملکی خبر ایجنسی کے مطابق سٹار لنک نے اپنی ویب سائٹ پر ایک پیغام جاری کیا جس میں بتایا گیا کہ سیٹلائٹ انٹرنیٹ سروس سٹار لنک کو سروس بندش کا سامنا ہے تاہم کمپنی نے مزید تفصیلات جاری نہیں کیں۔
آن لائن ٹریکنگ پلیٹ فارم ڈاؤن ڈیٹیکٹر کے مطابق سروس بند ہونے والے امریکا میں سٹار لنک کے 43 ہزار صارفین متاثر ہوئے اور انہیں انٹرنیٹ استعمال میں مشکلات کا سامنا ہے۔
اس سے قبل رواں سال جولائی میں بھی سٹار لنک کو سروس کی ایک بڑی بندش کا سامنا کرنا پڑا تھا جس کی وجہ سے ہزاروں صارفین کو انٹرنیٹ سروس استعمال کرنے میں مشکلات کا سامنا کرنا پڑا تھا۔
جولائی میں آنے والے اس خلل کے بعد ایلون مسک اور ان کی کمپنی کے سینئر ایگزیکٹوز نے صارفین سے معافی بھی مانگی تھی۔
