کیلیفورنیا: (ویب ڈیسک) انسٹنٹ میسیجنگ ایپلی کیشن پر سٹیٹس یا سٹوری کے حوالے سے دلچسپ فیچر کی آزمائش شروع کر دی گئی۔
واٹس ایپ کی اپڈیٹس پر نظر رکھنے والی ویب سائٹ کے مطابق مذکورہ فیچر کے تحت کوئی بھی صارف اپنی سٹوری یا سٹیٹس دیکھنے والے کسی بھی صارف کو چیٹ لسٹ میں جائے بغیر ڈائریکٹ میسیج کر پائے گا۔
اس وقت سٹیٹس یا سٹوری دیکھنے والے افراد کی صرف فہرست نظر آتی ہے، ان کے نام نظر آتے ہیں لیکن دوسرا کوئی آپشن نہیں آتا لیکن نئے فیچر کے تحت سٹوری دیکھنے والے افراد کے نام کے ساتھ میسیج کا آئیکون بھی نظر آنے لگے گا۔
صارف جیسے ہی میسیج آئیکون پر کلک کرے گا تو سٹوری دیکھنے والے صارف کے پاس براہ راست میسیج چلا جائے گا۔
اس وقت سٹوری دیکھنے والے شخص کو میسیج کرنے کیلئے چیٹ باکس یا لسٹ میں جانا پڑتا ہے، تاہم نئے فیچر کے تحت ٹیپ چیٹ کے ذریعے ہی صارف کو براہ راست میسیج کیا جا سکے گا۔
مذکورہ فیچر کی آزمائش تک محدود صارفین کو رسائی دی گئی ہے، تاہم اگلے مرحلے میں زیادہ صارفین کو اس تک رسائی دینے کے بعد اسے پیش کئے جانے کا امکان ہے۔
