ایمیزون: (روزنامہ دنیا) ایمیزون کے جنگلات میں اگرچہ جانوروں کیلئے کھانے پینے کو بہت کچھ ہوتا ہے لیکن تتلیوں کیلئے نمکیات کی کمی ہوتی ہے۔ اس کیلئے تتلیوں کو مٹی سے نمک چوستے اور کچھووں اور مگرمچھوں کے آنسو پیتے ہوئے دیکھا گیا ہے۔
میڈیا رپورٹ کے مطابق اس عمل کی تصدیق کیلئے ایک ویڈیو بھی بنائی گئی ہے جسے لوگوں کی بڑی تعداد نے حیرت سے دیکھا ہے۔ حشرات کے ماہر فِل ٹوریس کو جنگل کا آدمی بھی کہا جاتا ہے جنہوں نے حال ہی میں ایک خوبصورت ویڈیو جاری کی جس میں نصف درجن سے زائد رنگ برنگی خوبصورت تتلیوں کو میٹھے پانی کے ایک ساکت کچھوے پر منڈلاتے دیکھا جاسکتا ہے جو اس کے سر پر آ کر اس کے آنسوؤں یا نمی سے نمکیات لے رہی ہیں۔
اسی ویڈیو میں آگے ایک اور خوبصورت تتلی کو تیندوے کے فضلے سے نمک چاٹتے دیکھا جاسکتا ہے اور یہ ایک حیرت انگیز منظر ہے جس میں دیکھا جاسکتا ہے کہ آخر کسطرح تتلیوں نے نمکیات کی کمی کا حل نکالا ہے۔ دیگر ماہرین نے اس ویڈیو کو ایک شاہکار قرار دیا ہے جس میں تتلیاں اپنی غذائی ضروریات پوری کرنے کیلئے ذہانت بھرے عمل کرتی دکھائی دیتی ہیں۔
