نیویارک: (روزنامہ دنیا) امریکہ میں ایئرپورٹ پر 2 سالہ بچہ والدین سے چھپ کر سامان رکھنے والی بیلٹ پر جا کر بیٹھ گیا اورسامان کے درمیان چلتا سامان رکھنے والے کمرے میں پہنچ گیا۔
میڈیا رپورٹ کے مطابق بچے کو بیلٹ پر بیٹھے دیکھ کر عملہ اور والدین حیران و پریشان رہ گئے۔ امریکی ریاست جارجیا کے شہر اٹلانٹا کے ایئرپورٹ پر 2سالہ بچہ والدین کے ساتھ تھا جو ان کی نظروں سے اوجھل ہو کر سامان رکھنے والی بیلٹ پر بیٹھ گیا اور سامان رکھنے والے کمرے تک پہنچ گیا، انتظامیہ نے بچے کو کمرے سے نکالا ،ننھے میاں اس ایڈونچر میں معمولی زخمی ہوئے۔
ننھے میاں اس وقت کچھ پریشان بھی نظر آئے جب سامان کو سکین کرنے کے دوران ایکسرے مشین میں سے گزارا جا رہا تھا اور ننھے میاں اس اندھیری ایکسرے مشین سے باہر نکلنے کی بھرپور کوشش کر رہے تھے، انھیں اندھیرے سے ڈر جو لگ رہا تھا۔
