آتشی شیر نے سٹیڈیم میں موجود لوگوں کی سانسیں روک دیں

بیونس آئرس: (روزنامہ دنیا) ارجنٹائن کے فٹبال کلب سٹوڈیو نیٹس نے اپنے سٹیڈیم کی بحالی کے بعد اس کا افتتاح کیا تو اس موقع پر ہزاروں شائقین نے تقریب میں شرکت کی۔

میڈیا رپورٹ کے مطابق اس موقع پر شعلوں سے گھرے ایک قوی الجثہ شیر نے سٹیڈیم کی چھت پر اپنی انٹری دی، یہ شیر دراصل ہولو گرام تھا جسے دیکھ کر شائقین نے اپنا دل تھام لیا۔ 

بھاری بھرکم شعلوں سے گھرے اور چیختے چنگھاڑتے شیر نے وہاں موجود لوگوں پر سحر طاری کر دیا۔ بچوں اور کمزور دل حضرات کی اس موقع پر چیخیں نکل گئیں، شیر نے پہلے سٹیڈیم کی چھت پر چہل قدمی کی اس کے بعد گراؤنڈ پر چھلانگ لگائی اور گراؤنڈ کا چکر لگا کر شعلوں میں غائب ہو گیا۔