مدھیہ پردیش: (ویب ڈیسک) عام طور پر لوگ مختلف طریقوں سے اپنے پالتو جانوروں کی سالگرہ مناتے اور خوشی کا اظہار کرتے ہیں۔
لیکن بھارت کی ریاست مدھیہ پردیش کے شہر دیواس سے ایک ایسی ویڈیو سوشل میڈیا پر وائرل ہوئی ہے جس میں دیکھا جا سکتا ہے کہ علاقہ مکین آوارہ کتے کی سالگرہ منا رہے ہیں۔
وائرل ویڈیو میں نوجوانوں کا ایک گروپ آوارہ کتے کو جیپ میں بٹھا کر سواری کروا رہا ہے جبکہ اس موقع پر کیک کاٹا گیا اور پٹاخے جلائے گئے، انہوں نے آوارہ کتے پر پھول نچھاور کئے اور اسے پھولوں کا ہار بھی پہنایا۔
علاقہ مکینوں نے ہاتھوں میں ہورڈنگز اٹھا رکھے ہیں جس پر درج ہے’’ہمارے پیارے، وفادار، خونکار لڈو بھائی کو جنم دن کی لاکھ لاکھ مبارکباد‘۔
ویڈیو کے اختتام پر انہوں نے پالتو جانوروں کی دیکھ بھال اور ان سے پیار کرنے کا پیغام دیا۔
اس پر ردعمل دیتے ہوئے ایک صارف نے لکھا کہ ’آپ نے میرا دل خوش کر دیا، ہمارے گلی کوچوں کے آوارہ کتے بھی کسی سے کم نہیں۔‘
