کولوراڈو: (ویب ڈیسک) امریکا میں 9 ملین ڈالر (23 ارب سے زائد) کا ہوٹل صرف 10 ڈالر (2700 روپے) میں فروخت ہو رہا ہے جس پر سوشل میڈیا صارفین نے حیرانگی کا اظہار کیا ہے۔
غیر ملکی میڈیا رپورٹ کے مطابق امریکی ریاست کولوراڈو کے دارالحکومت ڈینور میں واقع ہوٹل کی اس انتہائی کم قیمت کے پیچھے ایک شرط بھی رکھی گئی ہے وہ یہ کہ خریدار کو پوری عمارت کی تزئین و آرائش اور بے گھر افراد کیلئے ہوٹل کو رہائشگاہ میں تبدیل کرنے پر رضامند ہونا ہوگا۔
رپورٹ کے مطابق ڈینور شہر نے سال 2023 میں Stay Inn کے نام سے ایک سابقہ ہوٹل 9 ملین ڈالر میں خریدا، شہر نے چند چھوٹی اصلاحات کیں، لیکن عمارت پر تاحال بہت زیادہ کام کی ضرورت ہے، دراصل یہ شہر بے گھر افراد کی مدد کرنا چاہتا ہے، اس لئے یہ شرط عائد کی گئی ہے کہ جو بھی ہوٹل خریدے وہ اسے ایک رہائش گاہ میں تبدیل کر کے بے گھر افراد کی مدد کرے۔
رپورٹ میں کہا گیا کہ اس منفرد ڈیل نے دنیا بھر کے لوگوں کی توجہ اپنی طرف مبذول کرائی ہے، جس سے بہت سے لوگوں کو اس بات کے بارے میں تجسس پیدا ہوگیا ہے کہ ہوٹل کی تزئین و آرائش اور بے گھر افراد کو انتہائی ضروری مدد فراہم کرنے کے چیلنج کا مقابلہ کون کرے گا۔
ڈینور کے ہاؤسنگ ڈیپارٹمنٹ کے ترجمان ڈیرک ووڈبری کے مطابق ہوٹل کی تزئین و آرائش کیلئے ایک ڈویلپر کے انتخاب کا عمل شروع ہو چکا ہے، وہ درخواست دہندگان کا جائزہ لے رہے ہیں اور پھر اپنی تجویز سٹی کونسل کو منظوری کیلئے بھیجیں گے۔
ڈیرک ووڈبری نے ایک ای میل میں کہا کہ ہم پر امید ہیں کہ ہوٹل کو معاون رہائش میں تبدیل کرنے کا راستہ تلاش کر لیں گے، جو واقعی ہماری کمیونٹی کی مدد کرے گا۔
