قاہرہ: (ویب ڈیسک) مصر کے شہر الغردقہ کے جنرل ہسپتال میں ڈاکٹروں نے کامیاب سرجری کے بعد ایک شخص کے معدے سے موبائل فون نکال لیا۔
ریڈ سی ہیلتھ ڈائریکٹوریٹ کے مطابق مریض کو شدید پیٹ درد، مسلسل قے اور شدید کمزوری کی حالت میں ہسپتال لایا گیا تھا، سکین کے دوران معدے میں ایک بھاری شے کی موجودگی کا پتہ چلا، جو بعد میں ایک چھوٹا موبائل فون نکلا، جسے مریض نے غلطی سے نگل لیا تھا۔
ہسپتال کے ڈائریکٹر ڈاکٹر کریم الشبراوی نے بتایا کہ ماہر سرجنز کی ٹیم نے فوری آپریشن کر کے فون کو نکال لیا، سرجری بغیر کسی پیچیدگی کے مکمل ہوئی اور مریض ہوش میں آنے کے بعد مستحکم حالت میں ہے۔
تاہم اسے مزید نگرانی میں رکھا گیا ہے، حکام نے یہ وضاحت نہیں کی کہ فون معدے میں کیسے پہنچا۔
یہ واقعہ دنیا بھر میں ریکارڈ ہونے والے ان غیر معمولی کیسز میں شامل ہوگیا ہے جس میں مریضوں نے مختلف خطرناک اشیاء نگل لی تھیں، مصر میں اس سے قبل 2021ء میں بھی ایک ایسا ہی کیس رپورٹ ہوا تھا، جب ایک موبائل فون مریض کی غذائی نالی میں پھنس گیا تھا جسے ہنگامی سرجری کے ذریعے نکالا گیا تھا۔
