لندن: (ویب ڈیسک) برطانیہ میں ایک تین برس کی بچی کی ٹافی کھانے کی شدید خواہش نے اُس کے والدین کو 17 کروڑ 18 لاکھ پاکستانی روپے جتوا دیئے۔
انگلینڈ کے 44 سالہ ولڈیت بوجاپی کا کہنا ہے کہ وہ کبھی بھی اس لاٹری کا ٹکٹ نہ خریدتے اگر اُن کی بیٹی گھر واپس جاتے ہوئے ٹافیاں لینے کے لیے اصرار نہ کرتی، جب تیسری بار اُن کی بیٹی نے کہا کہ کیا میں کچھ ٹافیاں خرید سکتی ہوں، تو وہ دکان کی جانب مڑے۔
انہوں نے بتایا کہ جب انہیں لاٹری نکلنے کا پتہ چلا تو وہ بہت خوش ہوئے اور اُن کی بیٹی پہلے اپنے والد کی شہزادی تھی اب ملکہ بن گئی ہے، اُن کے پہلے پانچ نمبر 27، 30، 31، 41، 43 لگے جبکہ لکی سٹار 8 بھی لاٹری کے نمبر سے میچ کر گیا۔
اہلیہ ایبے کا کہنا ہے کہ میں گھر کی صفائی میں مصروف تھی جب میرے شوہر نے مجھے کال کی، میں باتھ روم صاف کر رہی تھی اور فون سننے کے لیے میں ہاتھوں پر پہنے ہوئے ربڑ کے دستانے اُتارنا نہیں چاہتی تھی، ولڈیٹ کا پہلا لفظ یہ تھا کہ نیویارک کی بکنگ کرو، میں نے لاٹری جیت لی۔
یہ جوڑا نیویارک میں اپنا ڈریم ٹرپ یا یادگار سفر منانے کے لیے پیسے جمع کر رہا تھا لیکن یہ ہمیشہ ہی مشکل ہو جاتا اور کسی وجہ سے پلان خراب ہو جاتا۔
انہوں نے کہا کہ اب ہمارے پاس پیسے ہیں، نیویارک جا سکتے اور اپنے خواب کو حقیقت میں بدل سکتے ہیں، سب سے زیادہ حیران کن لمحہ یہ تھا کہ جب میں نے اپنے 12 سالہ بیٹے کو بتایا کہ ہم لاٹری جیت گئے ہیں تو اُسے یقین دلوانا ہی بہت مشکل تھا۔
انہوں نے کہا کہ وہ سمجھ رہا تھا کہ ہم مذاق کر رہے ہیں اور پھر میں نے اسے لاٹری ایپ پر دکھایا تاکہ اسے ہماری جیت کا یقین آ جائے، وہ لاٹری سے جیتی رقم سے کوسوو میں موجود اپنی والدہ کی زندگی آسان بنانے کے لیے بھی کچھ کرنا چاہتے ہیں۔
نیشنل لاٹری کے سینئر مشیر اینڈی کارٹر کا کہنا ہے کہ ولڈیٹ اور اس کی فیملی کے لیے یقینی طور پر کچھ زبردست اور یادگار لمحات منتطر ہیں۔
