برازیلیا: (ویب ڈیسک) برازیلین شہری نے انشورنس کی رقم پانے کیلئے اپنی لگژری گاڑی جلا ڈالی تاہم بدقسمتی سے یہ سارا منظر علاقے میں لگے واحد کیمرے کی آنکھ میں محفوظ ہوگیا۔
غیر ملکی میڈیا کے مطابق برازیل کی سول پولیس سے ایک شخص نے رابطہ کیا اور دعویٰ کیا کہ مسلح افراد نے اسے زبردستی روکا اور اسے اس کی پورشے 911 کیریرا کی ڈِگی میں بند کر دیا، اجنبی شخص نے پولیس کو بتایا کہ اسے ایک دیہی علاقے میں لے جایا گیا جہاں اس کی گاڑی کو آگ لگا دی گئی، راہ گیروں نے اس کی چیخیں سن کر آخری لمحے میں اسے جلتی ہوئی گاڑی کی ڈِگی سے نکالا اور اسے معمولی جھلسنے کے زخم آئے۔
اس شخص نے پولیس کو یہ بھی بتایا کہ وہ حملہ آوروں کو نہیں جانتا اور نہ ہی یہ جانتا ہے کہ وہ اسے کیوں مارنے کی کوشش کر رہے تھے، تاہم پولیس کی تحقیقات میں کچھ عجیب حقائق سامنے آئے اور قریبی فارم کے کیمرے نے سارا معاملہ واضح کردیا کہ اس شخص نے اپنے اغوا کی جھوٹی کہانی سنائی ہے، حقیقت میں اس نے خود ہی اپنی کار کو آگ لگائی تھی۔ یہاں تک کہ جب اسے ثبوت دکھائے گئے، تب بھی وہ اپنی کہانی پر قائم رہا اور کہا کہ اس کے جسم پر جلنے کے نشانات ہی اس کی سچائی کا ثبوت ہیں۔
یہاں یہ بات قابلِ ذکر ہے کہ جلائی جانے والی لگژری کار پر موٹر وہیکل پراپرٹی ٹیکس کی ادائیگی باقی تھی، لیکن واجب الادا رقم ظاہر نہیں کی گئی، کار کی قیمت تقریباً 1,30,000 امریکی ڈالر لگائی گئی تھی، اس لیے امکان ظاہر کیا گیا کہ مالک نے انشورنس کی رقم حاصل کرنے کیلئے اسے جلانے کا منصوبہ بنایا تھا کیونکہ ٹیکس بقایا ہونے کی وجہ سے اسے بیچنا مشکل تھا۔
اس سارے واقعے میں ایک اور دلچسپ بات یہ ہے کہ کار کو جلانے کا یہ واقعہ اس علاقے کے واحد کیمرے میں ریکارڈ ہوا، کئی میل کے دائرے میں اور اس مذکورہ کیمرے کے علاوہ وہاں کوئی کیمرہ نہیں تھا، اس لیے کار مالک کو یقیناً اپنے منصوبے کی تکمیل کیلئے اس جگہ کا انتخاب کرنے پر پچھتاوا ہو رہا ہوگا۔
